कापी उद्योगमा तीन करोड बढी लगानी
दाङ, २३ फागुन । दाङमा कापी उद्योगमा लागनी बढ्दै गएको छ । घरेलु तथा साना उद्योग कार्यालय दाङका अनुसार विगत डेढदशकको अवधिमा जिल्लामा साढे तीन करोड बढी रुपैयाँ कापी उद्योगमा लगानी भएको छ ।
घोराही र तुलसीपुर उपमहानगरपालिका अन्तर्गत विभिन्न ठाउँमा स्थापना भएका १६ वटा कापी उद्योगमा तीन करोड ५१ लाख ५१ हजार बढी रुपैयाँ लगानी भएको घरेलु तथा साना उद्योग कार्यालय दाङका सूचना अधिकारी गोपाल पौडेलले जानकारी दिएका छन् ।
सूचना अधिकारी पौडेलका अनुसार तुलसीपुरमा आठवटा कापी उद्योगमा एक करोड ९० लाख १५ हजार र घोराहीमा स्थापना भएका आठ वटा कापी उद्योगमा एक करोड ६१ लाख ३६ हजार रुपैयाँ लगानी भएको छ । घरेलु तथा साना उद्योग कार्यालयका अनुसार स्थिर पुँजी एक करोड ५२ लाख ६८ हजार आठ सय र चालु पुँजी एक करोड ९८ लाख ८२ हजार दुई सय रुपैयाँ रहेको छ ।
विद्यालय तथा कलेजमा अध्ययनरत विद्यार्थीलगायत संघसंस्थाका लागि आवश्यक पर्ने कापी जिल्लामा उत्पादन गर्ने उद्देश्यले पछिल्लो समय उद्योग स्थापनासँगै लगानी समेत बढ्दै गएको बताएका छन् । खास गरी सहरी क्षेत्रमा कापी उद्योगहरू स्थापना गर्ने क्रम बढेको भन्दै सूचना अधिकारी पौडेलले भने, ‘बजारको समस्या नभएको र आम्दानी पनि राम्रो हुने भएकाले लगानी बढ्दै गएको छ ।’ उनका अनुसार अधिकांश उद्योगले जिल्ला बाहिरबाट कापी बनाउनका लागि कच्चा पदार्थ ल्याउने र कापी उत्पादन गरेर बजारमा लग्ने गरेका छन् ।
दाङमा उत्पादन भएका कापी दाङसँगै सल्यान, प्युठान, रोल्पा, रुकुमलगायतका पहाडी र पश्चिम नेपालका जिल्लाहरूमा कापी जाने गरेको छ । सूचना अधिकारी पौडेलका अनुसार कापी उद्योगमा घोराही र तुलसीपुरमा गरेर एक सय दुई जनाले रोजगारी प्राप्त गरेका छन् । जसमध्ये तुलसीपुरमा ६४ जना र घोराहीमा ३८ जना रहेको घरेलु तथा साना उद्योग कार्यालय दाङले जनाएको छ । कार्यालयका अनुसार कापी उद्योगमा व्यक्तिगत तथा सामूहिक लगानी गरेर उद्योग स्थापना भएका छन् ।