घोराहीमा कक्षा ८ को परीक्षामा होम सेन्टर नहुने
अमरराज आचार्य
दाङ, १८ फागुन । घोराही उपमहानगपालिकामा सञ्चालन हुने कक्षा ८ को परीक्षालाई थप व्यवस्थित गरिने भएको छ । होम सेन्टरका रूपमा विद्यार्थीले शैक्षिक सत्रको अन्तिममा दिने वार्षिक परीक्षा आफ्नै विद्यालयमा दिने व्यवस्थालाई परिमार्जन गरी परीक्षा केन्द्र नै तोकेर परीक्षा सञ्चालन गरिने भएको हो ।
यस वर्षदेखि कक्षा ८ को परीक्षा होम सेन्टर हटाउने भएको छ । विद्यार्थीले आफूले अध्ययन गरेको विद्यालयबाट परीक्षा दिन नपाउने भएका हुन् । यस वर्षदेखि कक्षा ८ को वार्षिक परीक्षामा होम सेन्टर हटाइने घोराही उपमहानगरपालिका सामाजिक विकास महाशाखा प्रमुख नारायणप्रसाद पौडेलले जानकारी दिए । उपमहानगरपालिकाले यस वर्षदेखि यस प्रकारको कार्य सुरु गर्न थालेको उनको भनाइ छ । कक्षा ८ को परीक्षा विद्यार्थीले आफूले अध्ययन गरेको विद्यालयमा दिन पाउने छैनन् भने कापी समेत आफूहरूले पढाएका शिक्षकले चेक गर्न पाउने छैनन् ।
यसले विद्यार्थीको वास्तविक अवस्था कस्तो रहेको छ भनेर जाँच गर्न सहयोग पुग्ने महाशाखा प्रमुख पौडेलले बताए । पुरक परीक्षा दिन पाउने व्यवस्था समेत गरिएको उनले बताए । पछिल्लो समय पढने संस्कृति समेत हराउँदै गएको समेत उनी बताउँछन् । ‘शिक्षाको गुणस्तर सुधारको लागि यस प्रकारको कार्य गर्न थालिएको हो’, प्रमुख पौडेलले भने,‘यस कार्यले शिक्षाको गुणस्तर सुधार ल्याउन सहयोग पुग्ने छ ।’
परीक्षाबाट आउने नजिता अनुसार थप योजना निर्माण गरेर अगाडि बढने योजना उपमहानगरपालिकाको रहेको छ । आफ्नो विद्यालयमा परीक्षा नहुने भए पछि विद्यार्थीले समेत अध्ययन गर्न अपेक्षा गरिएको छ । कोभिड तथा विद्यालयमै परीक्षा सञ्चालन गर्दा नपढे पनि पास भइन्छ भन्ने विद्यार्थीको सोचको विकास भएको पौडेलले बताए । यसलाइ परिवर्तन गर्न सबैले सहयोग गर्नु पर्ने उनको भनाइ छ ।
यस वर्षदेखि महानगर क्षेत्रमा सञ्चालन गरिने कक्षा ८ को विद्यमान परीक्षा प्रणालीलाई परिमार्जन गरी थप व्यवस्थित बनाउन लागिएको हो । यस अघि विद्यालयमै परीक्षा सञ्चालन हुँदै आएको थियो । यसले विद्यार्थीलाई एसइई परीक्षाका लागि समेत मार्ग दर्शन प्रदान गर्ने अपेक्षा गरिएको छ ।
‘हालको परीक्षा सञ्चालन प्रणालीले विद्यार्थीलाई परीक्षाका सम्बन्धमा कुनै प्रकारको नयाँ अनुभूति मिल्ने अवस्था रहेन, यो आफ्नै विद्यालयमा तल्लो तहका नियमित परीक्षा जस्तै सीमित भयो,’ उनले भने, ‘अब यसलाई उनीहरूको निकट भविष्यमा हुने विद्यालय तहको निकै महत्वपूर्ण मानिने एसइई परीक्षाको पूर्व अभ्यासका रूपमा विकास गर्नुपर्छ, ताकि विद्यार्थी मानसिक रूपमा पनि त्यसका लागि तयार होस् ।’ यसो गर्दा कक्षा ८ का विद्यार्थीलाई परीक्षाका सम्बन्धमा नयाँ अनुभूति हुने र यो एसइई परीक्षाको पूर्व अभ्यासका रूपमा समेत महत्वपूर्ण हुने उनले बताए ।
यसले अन्तरविद्यालय विद्यार्थी घुलमिल, नयाँ साथीसँग उनीहरूको भेटघाट, नवीन वातावरणमा सामञ्जस्य, आफ्नो विद्यालय र अन्य विद्यालयको शैक्षिक तथा भौतिक अवस्थाको अनुभूति लगायतमा विद्यार्थीलाई नयाँ सिकाइ प्रदान गर्ने विश्वास गरिएको महाशाखाका प्रमुख पौडेलले बताए । उनका अनुसार महानगरपालिकाले विद्यार्थीको सिकाइ प्रवद्र्धनका लागि विभिन्न किसिमका रचनात्मक उपाय अवलम्बन गर्दै आएको छ । सोही अनुसार आधारभूत तहको परीक्षा प्रणालीमा सुधारसहित यसलाई समयानुकूल बनाउन लागिएको उनले बताए ।
परीक्षा केन्द्र तोक्दा सामान्य तया परीक्षा सञ्चालन प्रणालीको मापदण्डका आधारमा विद्यार्थीलाई पायक पर्ने गरी नै तोकिने उपमहानगरपालिकाले जनाएको छ । यस वर्ष कक्षा ८ को परीक्षा चैत ३ गतेबाट सञ्चालन हुने महाशाखा प्रमुख पौडेलले बताए । घोराहीमा करिब आठ हजार विद्यार्थी सहभागि हुने उनले बताए । सामुदायिक तथा संस्थागत गरी कक्षा ८ को परीक्षामा आठ हजार विद्यार्थी सहभागि हुने भएका छन् ।