दाङमा एसइईको तयारी पूरा : ४७ परीक्षा केन्द्र, १४ हजार बढी विद्यार्थी
लीलाधर वली
दाङ, ६ चैत । दाङमा माध्यमिक शिक्षा परीक्षा (एसइई) को सम्पूर्ण तयारी पूरा भएको शिक्षा विकास तथा समन्वय इकाइले जनाएको छ । चैत ७ गतेदेखि हुन थालेको एसइई परीक्षालाई अनुशासित, मर्यादित, भयरहित, स्वच्छ वातावरणमा सम्पन्न गर्नका लागि परीक्षा केन्द्रमा केन्द्राध्यक्ष तोक्नेदेखि अभिमुखीकरणसँगै उत्तरपुस्तिका सम्बन्धित परीक्षा केन्द्रमा पठाउने काम सकिएको कार्यालयले जनाएको छ ।
एसइई परीक्षार्थीका लागि आवश्यक उत्तरपुस्तिका सबै परीक्षा केन्द्रमा पुगिसकेको शिक्षा विकास तथा समन्वय इकाइका शाखा अधिकृत तिलकराम बञ्जाडेले जानकारी दिएका छन् । उनका अनुसार दाङमा यो वर्ष ४७ वटा परीक्षा केन्द्रबाट १४ हजार दुई सय ५४ जना विद्यार्थीले एसइई दिँदैछन् । एसइईका लागि घोराही र तुलसीपुर उपमहानगरपालिकामा १४÷१४ वटा, लमही नगरपालिकामा पाँच वटा, राप्ती गाउँपालिकामा तीन वटा, दंगीशरण, शान्तिनगर र बबई गाउँपालिकामा २÷२ र बंगलाचुली गाउँपालिका र राजपुर गाउँपालिकामा १÷१ वटा परीक्षा केन्द्र निर्धारण गरिएको छ ।
जिल्लामा एक सय १२ सामुदायिक र एक सय ४१ संस्थागत विद्यालय गरी दुई सय ५३ वटा विद्यालयबाट १४ हजार दुई सय ५४ जना विद्यार्थीले एसइई दिन लागेका छन् । जसमा प्राविधिक धारतर्फ ११ र एउटा खुल्ला विद्यालय रहेको कार्यालयले जनाएको छ । जिल्लामा यो वर्ष एसइई दिनेमा छात्रभन्दा सात सय २२ जना बढी छात्रा छन् । शिक्षा विकास तथा समन्वय इकाइ दाङका अनुसार छ हजार सात सय ६६ छात्र र सात हजार चार सय ८८ जना छात्राले एसइइ दिन थालेका छन् । शाखा अधिकृत बञ्जाडेका अनुसार गत वर्ष जिल्लामा १२ हजार आठ सय ९८ जना विद्यार्थी एसइई परीक्षामा सहभागी भएका थिए ।
जिल्लामा नियमितर्फ पाँच हजार सात सय ६३ छात्र र छ हजार एक सय ३३ जना छात्रा गरी ११ हजार आठ सय ९६ जना, गे्रट वृद्धितर्फ छात्र एक हजार १९ जना र छात्रा एक हजार तीन सय ७३ जना गरी दुई हजार तीन सय ९२ जना रहेका छन् । जिल्लामा यस वर्ष पाँच जना दृष्टिविहीन विद्यार्थीले एसइई दिन दिने भएका छन् । जसमा तुलसीपुरमा रहेको स्रोत कक्षा गुरु जजुर माध्यमिक विद्यालयबाट तीनजना छात्र र एक जना छात्रा गरेर चार जना र आदर्श माध्यमिक विद्यालय लालमटियाबाट एक जना छात्रले एसइई दिन थालेको शिक्षा विकास तथा समन्वय एकाइ कार्यालयले जनाएको छ । यसैगरी घोराही कारागारमा रहेका दुई जना कैदीबन्दी र बाँकेमा रहेको बालसुधार गृहमा रहेका तीन जनाले एसइई परीक्षामा सहभागी हुनका लागि निवेदन दिएको तर कार्यालयबाट सहभागी गराउने वा नगराउने भन्ने अझै निर्णय नभएको शाखा अधिकृत पाण्डेयले बताएका छन् ।
जिल्लाका १० वटै स्थानीय तहमा विद्यार्थीलाई पायक पर्ने गरी यो पटक परीक्षा केन्द्र निर्धारण गरिएको शाखा अधिकृत बञ्जाडेले बताएका छन् । चैत७ गते विहीवारदेखि १९ गते मङ्गलवारसम्म बिहान ८ बजेबाट ११ बजेसम्म परीक्षाको समय तालिका रहेको छ । पहिलो दिन अनिवार्य अङ्ग्रेजी विषयको परीक्षा हुने छ । उक्त दिन संस्कृत वेद्विद्याश्रमतर्फ अनिवार्य संस्कृत र मदरसातर्फ अनिवार्य अरेविक भाषाको परीक्षा हुनेछ । दोस्रो दिन चैत ८ गते अनिवार्य नेपाली विषयको परीक्षा हुने छ । उक्त दिन गैरनेपाली विद्यार्थीका लागि अङ्ग्रेजी (इलेक्टिभ इङ्लिस)को परीक्षा हुनेछ । चैत १० गते अनिवार्य गणित र चैत १२ गते अनिवार्य विज्ञान विषयको परीक्षा हुने परीक्षा नियन्त्रण कार्यालयको तालिकामा उल्लेख छ । १९ गतेसम्म हुने परीक्षामा विद्यार्थीले रोजेको विषय अनुसार परीक्षा हुने गरी तालिका सार्वजनिक गरिएको छ ।
परीक्षामा १३ सय जनशक्ति खट्ने
जिल्लामा हुन थालेको एसइई परीक्षाका लागि करिब १३ सय जनशक्ति खटिने भएका छन् । शिक्षा विकास तथा समन्वय इकाइ दाङका अनुसार एसइइका लागि ४७ वटा परीक्षा केन्द्रमा ४७ जना परीक्षा केन्द्राध्यक्ष, ९८ जना सहायक केन्द्राध्यक्ष, सात सय १८ जना निरीक्षक, एक सय ४४ जना सहायक कर्मचारी र दुई सय ८५ जना सहयोगी कर्मचारी गरी एक हजार दुई सय ९२ जना कर्मचारी खटिने भएका छन् । परीक्षा केन्द्रको सुरक्षा संवेदनशीलता र विद्यार्थीको सङ्ख्याको आधारमा १० देखि १५ जना सुरक्षाकर्मी परीक्षामा खटिने भएका छन् ।
जिल्लामा यो वर्ष सबैभन्दा धेरै विद्यार्थी तुलसीपुर स्थित गोरखा बोर्डिङ स्कुलमा रहेको परीक्षा केन्द्रमा पाँच सय ६५ जना र सबैभन्दा कम विद्यार्थी वीरेन्द्र माध्यमिक विद्यालय खिलतपुरमा रहेको परीक्षा केन्द्रमा एक सय १६ जना विद्यार्थी रहेका छन् । परीक्षामा पुस्तक, नोट, मोबाइल इलेक्ट्रोनिक्स डिपभाइस तथा परीक्षामा सहयोग गर्ने सामग्री प्रतिबन्ध लगाइएको छ ।