तिहारलाई माला गाँस्न भ्याइनभ्याइ
![](https://samanantar.com/wp-content/uploads/2023/11/FULKA-MALA-900x450.jpg)
सुशीला वली
घोराही,२७ कात्तिक । जिल्लामा व्यवसायिक रुपमा फूलखेती गरेका किसानलाई अहिले फूल टिपेर माला गाँस्न भ्याइनभ्याइ भएको छ । तिहार नजिकिएसँगै किसानले फूल टिपेर माला बनाउन थालेका हुन् ।
घोराही उपमहानगरपालिका–१४ झिगौरामा व्यवसायिक रूपमा फूलखेती गर्नुभएका लोकेन्द्र रोका फूल टिपेर माला बनाउन थाल्नुभएको छ । यस्तै घोराही उपमहानगरपालिका–१३ का इन्द्रा बुढा मगर पनि तिहारका लागि फूल टिपेर माला बनाउन थाल्नुभएको छ । घोराही उपमहानगरपालिका–१४ मा फूल खेती गर्दै आउनुभएका वीरेन्द्र खड्काले पनि फूल टिपेर माला बनाउनसँगै विक्री गर्न थालेको भएको छ ।
विगतका बर्षहरुभन्दा यसबर्ष राम्रो पूmल उत्पादन भएकाले विक्री समेत राम्रो हुने अपेक्षा उहाँहरुको छ । लोकेन्द्र, इन्द्रा र वीरेन्द्र जस्तै जिल्लामा अहिले फूलखेती गरेका किसानले तिहारका लागि फूल बिक्रीको तयारी थालेका छन् । फूलको मालाको बढी माग हुने भएकाले तयारी थालिएको उहाँहरूको भनाइ छ । माला बनाएर शीतभण्डारमा राख्ने तर्खरमा किसान छन् । जिल्ला बाहिरबाट समेत फूलको माग आएको घोराही उपमहानगरपालिका–१४, झिगौरास्थित जलजला पुष्प खेती फार्मका सञ्चालक लोकेन्द्र रोका मगरले बताउनुभयो ।
‘जिल्लाभित्रैकै माग धेरै छ,’ उहाँले भन्नुभयो। रोका मगरले दुई बिघा जग्गा भाडामा लिएर फूलखेती गर्नुभएको हो । उहाँले झिगौरासँगै सुनपुरमा पनि फूल खेती गर्नुभएको छ । रोजगारीको सिलसिलामा सात वर्ष कतारमा बिताउनुभएका रोका मगरले जिल्लामा दशैँतिहारलगायत पर्व तथा अरु बेला फूलको माग आउन थालेपछि फूलखेती गर्न थाल्नुभएको हो । ‘दाङमा व्यावसायिक रूपमा फूलखेती कतै थिएन, काठमाण्डौमा फूलखेती व्यावसायिक रूपमा गरेको देखेको थिएँ, अनि यहाँ मैले पनि शुरु गरेको हुँ,’ रोका मगरले भन्नुभयो ।
रोका मगरले अहिले भारतको कोलकाताबाट अफ्रिकन मेरीगोल्ड जातको सयपत्रीको बीउ ल्याएर व्यावसायिक फूलखेती गर्दै आउनुभएको छ । घोराही बजार नजिकै फूलखेती गरेपछि आफूलाई बजारको समस्या नभएको उहाँ बताउनुहुन्छ । जिल्लाको घोराही, तुलसीपुर, लमही र भालुवाङ सहरबाट समेत फूलको माग हुने गरेको छ । पहिले तिहारका लागि मात्रै सयपत्री फूल उत्पादन गर्ने गरे पनि लोकेन्द्रले बाह्रै महिना फूल उत्पादन शुरु गरेको बताउनुभयो । फूलको माग दशैँतिहारमा बढी हुने गरेको उहाँको भनाइ छ । यसै गरेर विभिन्न औपचारिक कार्यक्रम, विवाह, पूजाआजाका लागि फूलको माग हुने गरेको उहाँको भनाइ छ ।
![Blog Post Ad](https://samanantar.com/wp-content/uploads/2022/03/dd.gif)
जिल्लामा फूलखेतीका लागि उपयुक्त रहेकाले यसको सदुपयोग गर्नसमेत रोका मगरको आग्रह छ । घोराही उपमहानगरपालिका–१३ डुम्मर गाउँमा पनि व्यावसायिक रुपमा फूलखेती गरिँदै आएको छ । इन्द्रा बुढाले विगत ७ वर्षपहिले देखि व्यावसायिक रुपमा फूलखेती गर्दै आउनुभएको हो । उहाँले पनि अहिले फूल टिपेर माला बनाउन थाल्नुभएको छ । तिहारका लागि माग हुन थालेको उहाँको भनाइ छ।
‘माला बनाउन थालेका छौँ,’ उहाँले भन्नुभयो । प्रति माला ८० देखि दुई सय रुपैयाँसम्म बिक्री गर्ने गरेको बुढाले बताउनुभयो । जिल्लामै व्यावसायिक रूपमा फूलखेती भएपछि बाहिरबाट आउने कृत्रिम मालालाई समेत विस्थापित गर्न सकिन्छ भनेर यस व्यवसायमा प्रवेश गरेको उहाँ बताउनुहुन्छ् । अहिले १२ कट्ठा जग्गा भाडामा लिएर व्यावसायिक रूपमा सयपत्री, मखमली, गोर्धौली र चाया फूलको खेती गरेको बुढाले बताउनुभयो ।
एकदुई कट्ठाबाट शुरु भएको जिल्लाको फूलखेती हालआएर २५ बिघामा पुगेको छ भने ५० भन्दा बढी किसान व्यावसायिक रुपमै फूलखेतीमा जोडिएका छन् । जिल्लाका तुलसीपुर उपमहानगरपालिका, लमही नगरपालिका, राप्ती गाउँपालिका र गढवा गाउँपालिकाले वातावरणीय सन्तुलन कायम राख्न तथा स्थानीयको उत्पादनलाई बढावा दिन सर्वसाधारणमा कृत्रिम फूलको प्रयोग नगरी प्राकृतिक फूलका माला प्रयोग गर्न र अटेरी गरे कारबाही सहितको सूचना जारी गरेका छन् ।
![Blog Post Ad](https://samanantar.com/wp-content/uploads/2023/04/93854672_303692535769339_3227106166067696342_n.jpg)
![Blog Post Ad](https://samanantar.com/wp-content/uploads/2023/10/jyotipunja.jpg)