तेस्रो दाङ जिल्लास्तरीय तेक्वान्दो प्रतियोगिता सुरु
दाङ, २१ मङ्सिर । दाङको घोराहीमा तेस्रो दाङ जिल्लास्तरीय तथा दोस्रो ध्वजबहादुर केसी स्मृति तेक्वान्दो प्रतियोगिता–२०८१ सुरु भएको छ ।
खेलकुद क्षेत्रको विकास तथा खेलाडीको क्षमता अभिवृद्धि गर्ने उद्देश्यले घोराही तेक्वान्दो डोजाङको आयोजनामा जिल्लास्तरीय तेक्वान्दो प्रतियोगिता सुरु भएको हो । प्रतियोगिताको उद्घाटन गर्दै घोराही उपमहानगरपालिका–१५ का अध्यक्ष रमेशकुमार पाण्डेयले खेलकुद क्षेत्रको विकास आवश्यक रहेको बताएका छन् । व्यक्तिगत स्वास्थ्य, अनुशासन र राष्ट्रको पहिचानसँग जोडिएको खेलकुद क्षेत्रको विकासका लागि पूर्वाधारमा लगानी आवश्यक रहेको बताए ।
फुटबल, क्रिकेटलगायतका खेलकुदमा लगानी पर्ने गरे पनि इन्डोर खेलकुदका प्रतियोगिताका पूर्वाधारमा अत्यन्त कम लगानी भइरहेको भन्दै कार्यक्रमका प्रमुख अतिथि पाण्डेयले भने,‘इन्डोर खेलका लागि कवर्ड हललगायतका आवश्यक पूर्वाधारमा जोड दिनुपर्छ । प्रतियोगिताले खेलकुद क्षेत्रको विकाससँगै खेलाडीको क्षमता अभिवृद्धिमा सहयोग पुग्छ ।’
कार्यक्रममा घोराही नगर खेलकुद समितिका संयोजक नरेन्द्र पुनले स्थानीय सरकारसँगै निजी क्षेत्रको सहयोगमा घोराहीमा विभिन्न खेलकुदका प्रतियोगिता भइरहेको भन्दै यी प्रतियोगिताले खेलकुद क्षेत्रको विकाससँगै खेलाडीको क्षमतावृद्धिमा सहयोग गर्ने बताए । घोराही तेक्वान्दो डोजाङको आयोजनामा यही मङ्सिर २१ र २२ गतेसम्म सञ्चालन हुने प्रतियोगितामा फाइटतर्फ खेलाडीले ९÷९ तौल समूहमा महिला तथा पुरुष खेलाडीले प्रतिष्पर्धा गर्ने छन् ।
प्रतियोगितामा महिला तथा पुरुष खेलाडीले समान २२ केजी, २५ केजी, २८ केजी, ३१ केजी, ३४ केजी, ३७ केजी, ३९ केजी, ४२ केजी, ४५ केजी, ४५ केजी र ५१ केजी मुनी तौल समूहमा प्रतिष्पर्धा गर्ने छन् । त्यसैगरी व्यक्तिगत तथा जोडी पुम्सेतर्फ पनि महिला पुरुष दुवैले खेलाडीले प्रतिष्पर्धा गर्ने छन् ।
प्रतियोगितामा प्रथम, द्धितीय हुने टिमले ट्रफिसहित मेडल र प्रमाणपत्र प्राप्त गर्ने छन् । प्रतियोगितामा जिल्लाका २३ बढी डोजाङका चार सय बढी खेलाडीको सहभागीता रहेको छ । घोराही तेक्वान्दो डोजाङ प्रमुख विरुभाई बज्राचार्यको अध्यक्षतामा भएको प्रतियोगिताको उद्घाटन कार्यक्रममा तेक्वान्दो प्रशिक्षक राकेश परियारलगायतले प्रतियोगिताको शुभकामना मन्तव्य व्यक्त गरेका थिए । प्रकृति पुनको स्वागत मन्तव्यबाट सुरु भएको कार्यक्रमको सहजीकरण पत्रकार चन्द्रप्रकाश नेपालीले गरेका थिए ।