घोराहीमा अन्तरविद्यालय तथा क्लवस्तरीय बक्सिङ प्रतियोगिता
दाङ,२२ मंसिर । घोराहीमा दोश्रो अन्तर विद्यालय तथा क्लव स्तरीय बक्सिङ प्रतियोगिता सम्पन्न भएको छ । घोराही उपमहानगरपालिका खेलकुद विकास समितिको आयोजनामा घोराही उपमहानगरपालिका–१४ घाराही कवर्ड हलमा भएको प्रतियोगितामा जनज्योति विद्यामन्दिरको टिम उत्कृष्ट बन्न सफल भएको छ ।
प्रतियोगितामा दुई स्वर्ण, एक रजत र एक काश्य पदक जित्दै जनज्योति विद्यामन्दिरको टिम उत्कृष्ठ बन्न सफल भएको हो । जसमा जेलिस रोका र जय केसीले स्वर्ण, उज्वल खड्काले रजत र टाइसन जिएमले काश्य पदक जित्न सफल भएका थिए । त्यसैगरी प्रतियोगितामा पुरुषतर्फ ग्यालेक्सी एकेडेमीका सन्तोष बुढामगर र महिलातर्फ द अल्फा स्पोर्ट सेन्टरकी पुष्पा थापा उत्कृष्ट खेलाडी बन्न सफल भएका छन् ।
घोराही उपमहानगरपालिका खेलकुद विकास समितिका संयोजक नरेन्द्र पुनको अध्यक्षता तथा घोराही उपमहानगरपालिका–१४ का अध्यक्ष भानसिंह बुढाको प्रमुख आतिथ्यता एवं नेपाल बक्सिङ संघका केन्द्रीय उपाध्यक्ष शोभाजंग केसीको विशिष्ट आतिथ्यतामा प्रतियोगिताको समापन गरिएको थियो ।
बिजेता खेलाडीहरुलाई कार्यक्रमका प्रमुख अतिथि तथा विशिष्ट आतिथिहरुले पुरस्कार वितरण गरेका थिए ।
मंसिर २१ र २२ गते दुई दिनसम्म सञ्चालन भएको प्रतियोगितामा १५ विद्यालयका ५३ जना खेलाडीको सहभागीता रहेको थियो । कार्यक्रमको सहजीकरण द अल्फा स्पोर्ट सेन्टरकी प्रमुख कृष्णा सुनार ‘कृष्टिना’ गरेकी थिइन ।