गाडी दुर्घटनामा दुइ महिलाको मृत्यु,१२ जना घाइते
घोराही, १ पुस । दाङमा गाडी दुर्घटनामा दुई जनाको मृत्यु भएको छ । पूर्व–पश्चिम राजमार्गअन्तर्गत लमही नगरपालिका–९ च्याउँखोला बक्सकटिङ नजिकै सोमवार विहान लु १ ज ४२९८ नम्वरको विङ्गर गाडी दुर्घटना हुँदा दुई महिलाको मृत्यु भएको हो ।
दुर्घटनामा कपिलवस्तुको शिवराज नगरपालिका–३ निवासी ६० वर्षीया फुलसी थारु र सोही ठाउँ निवासी ४२ वर्षीया तिर्थी थारुको मृत्यु भएको जिल्ला प्रहरी कार्यालय दाङले जनाएको छ । मृतकको शवलाई पोष्टमार्टमका लागि लमही अस्पतालमा राखिएको छ ।
दुर्घटनामा शिवराज नगरपालिका–३ निवासी ४५ वर्षीय मिथिया थारु, सोही ठाउँ निवासी ६५ वर्षीय तेहली थारु, ६० वर्षीया महंगी थारु, ४० वर्षीया सरिता थारु, ५५ वर्षीया रामपियारी थारु, ७७ वर्षीया दर्शनी थारु, ४७ वर्षीय रामचन्द्र थारु, ४५ वर्षीय बुद्धि चौधरी, ४५ वर्षीया फुलबजनी चौधरी, ३८ वर्षीय बुद्धराम थारु र ३६ वर्षीय सुरेश यादव घाइते हुनुभएको छ । घाइतेहरुको लमही अस्पतालमा उपचार भइरहेको जिल्ला प्रहरी कार्यालय दाङ प्रवक्ता एवं प्रहरी नायव उपरीक्षक इश्वर थापाले जानकारी दिनुभएको छ । उहाँका अनुसार चालकलाई प्रहरीले नियन्त्रणमा लिएको छ ।
प्रहरीका अनुसार मृतक तथा घाइतेहरु क्रिश्चियन धर्मालम्वीहरुको कार्यक्रममा सहभागी हुनका लागि कपिलवस्तुको चन्द्रौटाबाट बर्दियातर्फ जाँदै थिए । गाडी सोमवार विहान करिव ५ बजेतिर दुर्घटनामा परेको थियो । प्रहरीका अनुसार गाडीमा १४ जना सवार रहेका थिए । तीव्र गतिका कारण गाडी दुर्घटनामा परेको हुन सक्ने प्रहरी नायव उपरीक्षक थापाले जानकारी दिनुभएको छ ।