माघे मेलामा बढ्दै उत्साह,गायक रानासँगै नाचे दर्शक
भ्युमान पुनमगर
घोराही, ७ माघ । घोराहीमा सञ्चालित प्रथम पर्यटन तथा सांस्कृतिक प्रदर्शनी माघे मेलामा दर्शकको सहभागीता बढ्दै गएको छ । मेला अवलोकनसँगै मनोरञ्जनका लागि दर्शकको सहभागीता बढ्दै गएको हो ।
घोराही उपमहानगरपालिका–१४ झिंगौरामा सञ्चालित मेलाको तेस्रो दिन सोमवार लोक तथा दोहोरी गायक श्याम रानामगरलगायतले दर्शकलाई मनोरञ्जन प्रदान गरेका छन् । लोक तथा दोहोरी गीतमा चर्चित गायक राना पछिल्लो समय ‘रेलै सलल’ गीतबाट चर्चामा छन् । मेलामा गायक रानाले रेलै सलल गीत गाउँदा दर्शकले सँगै गाउँदै नाचेर साथ दिएका थिए ।
गीतमा रानालाई दर्शकले साथ दिए । मेलामा सोमवार रानासँगै गायक टेक बिसी, गायिका तथा चर्चित उद्घोषिका रुपा घर्ती मगर ,गायिका रेशमा पुन, गायक रोशन रत्गैया, गायिका बिष्णु सुनार,बिमला थापामगर,झरणा केसी, बर्षा मगर र बाबु रोकामगरलगायतका कलाकारले प्रस्तुति राखेको मेला आयोेजक नेपाल मगर संघ घोराही नगर समितिका अध्यक्ष तथा मेला आयोजक मुल समितिका संयोजक देवबहादुर बुढामगरले जानकारी दिएका छन् ।
मेलाको चौथो दिन नायक पल शाहसँगै मोडेल रुविना अधिकारी, गायक पे्रेमविवश घर्ती, डान्सर सुरक्षा मगर, साकिरा मगर, गायिक सञ्जिता बुढामगर,मोडल तथा उद्घोषक बिजय पुन, गायिका तथा उद्घोषक रुपा घर्ती, बाल कलाकार सान अधिकारीलगायतका कलाकार आउने मेला प्रचारप्रसार समिति संयोजक कैलाश घर्तीमगरले जानकारी दिएका छन् ।
सात दिनसम्म सञ्चालन हुने मेलाको आम्दानीबाट घोराही नगर मगर समितिले बहुउद्देश्यीय मगर सङ्ग्रहालय निर्माण गर्ने लक्ष्य राखेको छ । मेलामा जातिगत भेषभुषाका स्टल तथा खानाका परिकार, बाल उद्यानलगायत स्टल राखिएको छ ।