दक्ष प्रशिक्षक उत्पादन गर्न घाेराहीमा एन्फा कम्युनिटी कोचिङ कोर्स शुरु
घोराही, १० माघ । दाङको घोराहीमा चार दिने एन्फा कम्युनिटी कोचिङ कोर्स शुरु भएको छ । प्रशिक्षणमा दाङसहित विभिन्न जिल्लाबाट ४० जनाको सहभागीता रहेको छ । घोराही उपमहानगरपालिका अन्तरगत रहेको नगर खेलकुद विकास समितिको आयोेजना तथा अखिल नेपाल फुटबल संघ, एन्फाको प्राविधिक सहयोगमा दक्ष फुटबल प्रशिक्षक उत्पादन गर्न र खेलकुदको संस्थागत विकास गर्न बिहीबारदेखि एन्फा कम्युनिटी कोचिङ कोर्स शुरु भएको हो ।
नगर खेलकुद विकास समिति संयोजक नरेन्द्र पुनको अध्यक्षतामा शुरु भएको प्रशिक्षणको उदघाटन गर्दै लुम्बिनी प्रदेश खेलकुद परिषदका सदस्य सचिव तिरनदाज गौतमले खेलकुदको प्रवद्र्धन गर्न प्रशिक्षण आवश्यक रहेको बताउनुभयो ।
पालिकाले प्रशिक्षण कार्यक्रम गरेर प्रशिक्षकको दक्षता वृद्धि गर्दै खेलकुद विकासमा ध्यान दिनु सराहनीय पक्ष रहेको बताउनुभयो । खेलाडी उत्पादनमा तल्लो तहदेखि ध्यान दिएर भौतिक पूर्वाधार विकास गर्न र खेलमा लगानी बढाउन राज्यले ढिलाई गर्न नहुने उहाँको जोड थियो । सहभागी प्रशिक्षार्र्थीलाई खेल भावनाको विकासमा ध्यान दिएर प्रशिक्षण गर्न अपिल गर्नुभयो ।
म्याच फिक्सिङ, डोपिङ, खेलाडी पलायन, खेलमा निरन्तरता चुनौति रहेको हुँदा यसमा प्रशिक्षकले आफुले बुझ्न र अरुलाई पनि बुझाउन सुझाव दिनुभयो । यसैगरी, आफुले खेलकुद अतिरिक्त क्रियाकलाप नभई अनिवार्य शिक्षा हुनुपर्नेमा जोड दिँदै आएको तथा सामाजिक उत्तरदायित्व अन्तरगत खेलमा लगानी हरेक क्षेत्रले ध्यान दिनुपर्ने बताउनुभयो ।
कार्यक्रममा घोराही उपमहानगरपालिका सामाजिक विकास समिति संयोजक एवम् नगर प्रवक्ता राममणि पाण्डेले पालिकाले पूर्वाधार विकाससँगै मानवीय विकासमा ध्यान केन्द्रित गरेको हुँदा खेलकुद गतिविधि प्रभावकारी बनाउन र स्वस्थ नागरिक उत्पादन गर्न नगर खेदकुद विकास समितिमार्फत काम गरिरहेको बताउनुभयो ।
समृद्ध नेपाल सुखी नेपालीको नारा सार्थक बनाउन नागरिक स्वास्थ हुन आवश्यक रहेको उहाँको भनाई थियो । यसका लागि खेलकुदका गतिविधिबाट मात्रै नागरिक स्वस्थ हुने नीतिका साथ पालिकाले खेलकुदका गतिविधि गरिरहेको बताउनुभयो ।
खेलकुदको विकासका लागि नगर खेलकुद विकाास समितिले स्पष्ट नीति बनाउँदै प्रतियोगिता, प्रशिक्षण, पूर्वाधार विकास र प्रवद्र्धनका कार्यक्रम गरिरहेको नगर खेलकुद विकास समितिका सदस्य केशव थापाले बताउनुभयो । एन्फाका हेड अफ एजुकेसन कोच सञ्जित सिंह र हेड अफ ग्रासरुट पंकजबहादुर शाहीले प्रशिक्षण दिई रहनुभएको छ । चार दिन हुने प्रशिक्षण बारे जानकारी गराउँदै प्रशिक्षक सिंहले दाङमा भईरहेको एन्फा कम्युनिटी कोचिङ कोर्श छयालिसौँ ब्याचका रुपमा रहेको बताउनुभयो । हालसम्म १४ सय प्रशिक्षक तयार भईसकेको जानकारी गराउँदै चार दिने सैद्धान्तिक र प्रयोगात्मक कक्षाको भरपूर लाभ उठाउन अपिल गर्नुभयो ।
फुटबल प्रशिक्षणका लागि दाङबाट २१ जना, बाँकेबाट ४ जना, रौटहट र कपिलबस्तुबाट ३–३ जना, रुकुमपूर्व र रोल्पाबाट २–२ जना, स्याङ्जा, रुपन्देही, प्युठान, खोटाङ, सुनसरीबाट १–१ जना गरी ४० जना सहभागी भएका नगर खेलकुद विकास समिति संयोजक नरेन्द्र पुनले जानकारी दिनुभयो ।
नगर खेलकुद विकास समितिले आयोजना गरेको एन्फा कम्युनिटी कोचिङ कोर्समा देशका विभिन्न जिल्लाबाट प्रशिक्षणका लागि सहभागीता भएको जनाउँदै उहाँले आगामी दिनमा यस प्रकारका कार्यक्रम गर्न उत्साह थपेको संयोजक पुनले बताउनुभयो ।
खेलकुद विकास समिति सदस्य केशव थापाको स्वागत मन्तव्यबाट शुरु भएको कार्यक्रमको सहजीकरण नगर खेलकुद विकास समिति सदस्य श्रवणकुमार खनालले गर्नुभएको थियो ।