तेश्रो स्व. रत्नबहादुर विष्ट स्मृति कप फुटबल प्रतियोगिता हुने
दाङ,१९ माघ । घोराही उपमहानगरपालिका–१२ हापुर बिजौरी खेल मैदानमा तेश्रो स्वर्गीय रत्नबहादुर विष्ट स्मृति कप अन्तर विद्यालयस्तरीय फुटबल प्रतियोगिता हुने भएको छ ।
गुर्जे युवा क्लवको आयोजनामा यहि माघको २२ गतेदेखि तेश्रो स्वर्गीय रत्नबहादुर विष्ट स्मृति कप अन्तर विद्यालयस्तरीय फुटबल प्रतियोगिता हुन थालेको हो ।
दक्ष खेलाडी उत्पादन र खेलकुद क्षेत्रको विकासका लागि हुन थालेको प्रतियोगितामा कक्षा १२ सम्म अध्ययन गर्ने विद्यार्थीहरु सहभागी हुन पाउने आयोजक गुर्जे युवा क्लवका अध्यक्ष कमल नेपालीले जानकारी दिएका छन् ।
प्रतियोगिताको बिजेता टिमले नगद एक लाख ११ हजार एक सय ११ रुपैयाँसहित ट्रफि,मेडल र प्रमाणपत्र प्राप्त गर्नेछ भने उपबिजेता टिमले ५५ हजार पाँच सय ५५ रुपैयाँसहित ट्रफि,मेडल र प्रमाणपत्र प्राप्त गर्नेछ । साथै प्रतियोगितामा उत्कृष्ठ खेल प्रदर्शन गर्ने खेलाडीलाई पनि पुरस्कृत गरिने आयोजक गुर्जे युवा क्लवले जनाएको छ ।