सिद्धरत्ननाथ मठमा पिरफेरे मेलाको तयारी
दाङ, ९ फागुन । घोराही उपमहानगरपालिका–१७ रत्नपुर चौघेरामा रहेको ऐतिहासिक एवम् धार्मिकस्थल गोरक्ष पात्रदेवता–सिद्धरत्ननाथ मठको पिर स्थापना अनुष्ठान एवम् पिरफेरे (पिर फेर्ने) मेलालाई यो वर्ष भव्य बनाइने भएको छ ।
हरेक वर्ष विजया एकादशीका दिन लाग्ने पिरफेरे मेलाको प्रचारप्रसारसँगै भव्य बनाउनका लागि विभिन्न सांस्कृतिक झाँक्री तथा नृत्य प्रस्तुत गरिने भएको छ । शिवरात्रीभन्दा दुई दिन अघि अर्थात् विजया एकादशी फागुनको १२ गते लाग्ने मेलामा जनसहभागिता बढाउन लागि व्यावसायिक स्टलहरूसँगै दङाली जादुगर प्रभु चौधरीको जादु, मौलिक थारू, मगर, सोरठीलगायतका विभिन्न नृत्य प्रस्तुत गर्ने कार्यक्रम रहेको मेला व्यवस्थापन समितिका संयोजक तथा घोराही उपमहानगरपालिका–१७ का वडाध्यक्ष रामलौटन चौधरीले जानकारी दिएका छन् ।
ऐतिहासिक मेलालाई भव्यसँगै धेरैभन्दा धेरैको सहभागिता गराउने गरी मेलाको तयारी भइरहेको भन्दै वडाध्यक्ष चौधरीले भने, ‘यो १७ नम्बर वडासँगै दाङको ऐतिहासिक मेला हो, मेलालाई भव्य बनाउनसके हामी सबैको गौरव बढ्छ ।’ ऐतिहासिक धार्मिक मेलालाई भव्य बनाउने गरी लागेको र अहिले मठ स्थलमा रँगरोगनसँगै सरसफाइको काम भइरहेको गोरक्ष पात्रदेवता सिद्धरत्ननाथ मठका सदस्य सचिव डा भोलानाथ योगीले बताए । हरेक वर्ष फागुन कृष्णपक्षको एकादशीका दिन मठमा मेलासँगै नयाँ मठाधीश (पिर) फेर्ने प्रचलन रहेको छ । गोरक्षपात्रदेवता सिद्धिरत्ननाथ मठमा दैनिक सात्विक तान्त्रिक विधिबाट रात्रिकालमा नित्य पूजा गर्ने परम्परा रहेको छ । चौघेरामा मात्र रहेको भन्दै त्यही कारण चौघेरा मठको ऐतिहासिक महत्व भएको सदस्य सचिव योगीले बताए ।
्विजया एकादशीका मठको मठाधीश (पिर) समेत फेर्ने गरिन्छ । मठाधीशलाई मठको प्रमुखका रूपमा मान्ने गरिन्छ । मठाधीशले मठको परिसरभन्दा बाहिर निस्कन नपाउने र दैनिक पूजाआजामा सहभागी हुने व्यवस्था छ । मठाधीश बन्नका लागि ब्रह्मचारी बसेको, कान चिरेको योगी हुनुपर्ने परम्परा रहेको छ । नेपाल पत्रकार महासंघ दाङ शाखा अध्यक्ष सन्तोष सुवेदीले ऐतिहासिक एवम् धार्मिक पिरफेर्ने मेलाको ऐतिहासिक महत्वसँगै प्रचारप्रसारका लागि सञ्चार माध्यमबाट सहयोग गर्ने बताए । त्यसका लागि मठले सञ्चार माध्यमसँगै सञ्चारकर्मीसँग समन्वय गरेर अघि बढ्नुपर्ने सुझाव दिएका थिए । दङाली जादुगर प्रभु चौधरीले ऐतिहासिक एवम् धार्मिक मेला पिरफिरेलाई थप आकर्षित बनाउन पहिलो पटक जादु देखाउन थालेको भन्दै मेलालाई सफल बनाउन सबै लागेर प्रचारप्रसार गर्नुपर्ने बताएका थिए ।
गोरक्ष पात्रदेवता–सिद्धरत्ननाथ मठका पिर मठाधीश ब्रह्मनाथको अध्यक्षतामा भएको कार्यक्रममा मठका महन्त सुरतनाथ योगीले मन्दिरमा हुने पूजा विधिबारे जानकारी दिएका थिए । मठका सल्लाहकार हरिप्रसाद पाण्डेयको स्वागत मन्तव्यबाट सुरु भएको कार्यक्रमको सहजीकरण तोयानाथ योगीले गरेका थिए । पत्रकार सम्मेलन तथा छलफल कार्यक्रममा पत्रकार तथा स्थानीय विभिन्न टोल विकासका प्रतिनिधि, मठ सञ्चालक समितिका पदाधिकारीलगायतको उपस्थिति रहेको थियो ।