लखन थापा कप फुटबलको उपाधिका लागि चौघेरा स्पोर्ट्स एकेडेमी र बिएफएल भिड्ने
घोराही, ९ फागुन । नेपालका प्रथम शहीद लखन थापा मगरको १४८औँ स्मृतिमा घोराहीमा जारी खुल्ला नकआउट प्रतियोगिताको फाईनलमा बिएफएल र चौघेरा स्पोर्ट्स एकेडेमी उपाधि नजिक पुगेका छन् ।
नेपाल मगर संघ घोराही नगर समितिको आयोजनामा घोराही उपमहानगरपालिका वडा नम्बर १८ नवलपुर फुटबल मैदानमा जारी खुल्ला नकआउट प्रतियोगितामा शुक्रबार भएको पहिलो सेमीफाईनलमा चौघेरा स्पोर्ट्स एकेडेमीले युएनबीसीलाई ४–१ गोल अन्तरले तथा दोस्रो सेमीफाईनलमा बिएफएलले नवलपुर फुटबल एकेडेमीलाई १–० गोलले हराउँदै फाईनलमा प्रवेश गरेका छन् ।
पहिलो सेमीफाईनलमा चौघेरा स्पोर्ट्सका लागि पहिलो हाफको ३९ मिनेटमा हेमन्त बिकले १ गोल गर्दै १–० को अग्रता दिलाउनुभयो । दोस्रो हाफमा चौघेराकै सागर पुनले ३, ११ र १६ मिनेटमा लगातार ह्याट्रिक गोल गर्नुभयो । युएनबीसीका निशान घर्तीले १ गोल गर्नुभयो । टीमलाई सहज जीत दिलाउन ह्याट्रिक गोल गर्नुभएका सागर पुन प्लेयर अफ द म्याच हुनुभयो ।
दोस्रो सेमीफाईनलमा भने बिएफएलले नवलपुर फुटबल एकेडेमी विरुद्ध संघर्षपूर्ण जीत निकाल्यो । पहिलो हाफ गोलरहित खेलेको बिएफएलले पेनाल्टीमार्फत गोल गर्दै फाईनलमा पुगेको छ ।
दोस्रो हाफको २२ मिनेटमा पेनाल्टी एरियामा रहेको बललाई अघि बढाउने क्रममा नवलपुर फुटबल एकेडेमीका मौसम थापाको फल गरेपछि बिएफएलले पेनाल्टीको मौका पाएको हो । उक्त अवसरलाई बिएफएलका प्रमोद बुढाले गोलमा परिणत गर्नुभयो । प्रमोद प्लेयर अफ द म्याच हुनुभयो ।
अब प्रतियोगिता अन्तरगत शनिबार फाईनल खेल हुनेछ । फाईनल खेल दिउँसो १ बजेपछि हुने प्रतियोगिता संयोजक इराक घर्तीले जानकारी दिनुभयो । प्रतियोगितामा दाङसहित सल्यान, रोल्पाका गरी कुल १६ टीमको सहभागीता रहेको संयोजक घर्तीले बताउनुभयो ।
प्रतियोगितामा प्रथम हुने टीमले नगद १ लाखसहित शिल्ड, मेडल र प्रमाण पत्र पाउने छ भने द्वितीय हुने टिमलाई पचास हजार नगदसहित शिल्ड, मेडल र प्रमाणपत्र पुरस्कार मगर दिवसका दिन फागुन १५ गते प्रदान गरिने प्रतियोगिता सहसंयोजक अशोक घर्तीले जनाउनुभयो । यसैगरी विधागत उत्कृष्ट खेलाडीलाई पनि पुरस्कृत गरिने आयोजकको भनाई छ ।
शहीद थापा मगरको स्मृति दिवसको अवसरमा हरेक वर्ष फुटबल प्रतियोगिताको आयोजना गर्दै आइरहेको भन्दै आयोजक नेपाल मगर संघले खेलकुदको विकाससँगै शहीदको सम्मानका लागि कार्यक्रम आयोजना गरेको जनाएको छ ।