मेरील्याण्ड एकेडेमीद्वारा बिजेता खेलाडी सम्मान

दाङ, २० फागुन । घोराही उपमहानगरपालिका–१३ मा रहेको मेरील्याण्ड पब्लिक एकेडेमीले स्वर्ण पदक बिजेता खेलाडीलाई सम्मान गरेको छ ।
विद्यालयले एक कार्यक्रमको आयोजना गरेर यहि फागुनको १० र ११ गते सम्पन्न लुम्बिनी प्रदेशस्तरीय आईटिएफ तेक्वान्दो प्रतियोगितामा स्वर्ण पदक र फागुन १६ र १७ गते काठमाडौंमा भएको राष्ट्रिय तेक्वान्दो प्रतियोगितामा कास्य पदक विजेता खेलाडी सदीक्षा पुनलाई सम्मान गरेको हो । प्रतियोगितामा ६० देखि ६४ केजी तौल समूहमा प्रतिष्पर्धा गरेकी खेलाडी पुनले कास्य पदक जित्न सफल भएकी थिइन् ।
राष्ट्रिय खेलकुद प्रतियोगितामा पदक जितेपछि विद्यालयले कार्यक्रमको आयोजना गरेर सम्मान गरेको हो । बिजेता खेलाडीलाई कदरपत्रसहित नगद तीन हजार रुपैयाँ प्रदान गरेर सम्मान गरिएको थियो । नौमतिबाजासहित खेलाडीलाई बजार परिक्रममा गराएर सम्मान गरेको मेरील्याण्ड पब्लिक एकेडेमीका प्रिन्सिपल राजेन्द्र श्रेष्ठले जानकारी दिएका छन् ।
खेलकुद क्षेत्रमा खेलाडीलाई अघि बढाउनदेखि विजेतालाई प्रोत्साहनका लागि विद्यालय सधै तयार रहेको बताएका थिए । कार्यक्रममा खेल प्रशिक्षक लीलाधर बस्नेतलाई समेत सम्मान गरिएको थियो । सम्मान कार्यक्रम विद्यालय व्यवस्थापन समितिका अध्यक्ष टेमन बुढाको अध्यक्षतामा भएको थियो । सम्मान कार्यक्रममा दाङ जिल्ला आईटिएफ तेक्वान्दो संघका अध्यक्ष भीम थापा, सल्लाहकार एवं पूर्व अध्यक्ष प्रेम बुढालगायतको सहभागीता रहेको थियो ।