कर्तव्य ज्यान मुद्धाका फरार दम्पती २४ वर्षपछि पक्राउ
घोराही, २१ फागुन । दाङमा प्रहरीले कर्तव्य ज्यान मुद्दाका फरार दम्पतीलाई २४ वर्षपछि पक्राउ गरेको छ ।
कर्तव्य ज्यान मुद्धामा अदालतबाट २० वर्ष कैद सजाय तोकिएका राप्ती गाउँपालिका–९ (साविकको हाँसीपुर गाविस–१) निवासी ८१ बर्षीय जीतबहादुर दमाई र ५६ बर्षीय नमी दमिनीलाई प्रहरीले कपिलवस्तुबाट पक्राउ गरेको हो ।
घट्नापछि फरार रहेका दम्पतीलाई इलाका प्रहरी कार्यालय भालुवाङबाट खटिएको प्रहरी टोलीले कपिलवस्तु जिल्लाको शिवराज नगरपालिका–१ मा छुकीछिपी बसेको अवस्थामा फागुनको १९ गते पक्राउ गरेको जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक चक्रबहादुर शाहले जानकारी दिएका छन् ।
प्रहरी नायव उपरीक्षक शाहका अनुसार पक्राउ परेका दम्पतीलाई दाङ जिल्ला अदालतले २०५७ असोज ९ गते सर्वश्वसहित जन्मकैदको फैसल्ला गरेको थियो । जिल्ला अदालतको फैसलापछि तत्कालिन पुनरावेदन अदालत गएकोमा पुनरावेदन अदालतले २०५९ साल जेठ ६ गते मुद्धामा २० वर्ष कैद सजाय हुने फैसला गरेको थियो ।
पुनरावेदनको फैसलालाई २०६१ साल साउन १४ गते सर्वोच्च अदालतले सदर गरेपछि उक्त दम्पती फरार रहेको थियो । फरार रहेको दम्पतीलाई खोजी गर्ने क्रममा गोप्य सूचनाका आधारमा प्रहरीले फागुनको १९ गते सोमवार पक्राउ गरेको थियो । पक्राउपछि फैसल्ला कार्यान्वयनका लागि प्रहरीले दाङ जिल्ला अदालतमा बुझाएको र अदालतको आदेश अनुसार कारागार चलान भएको जिल्ला प्रहरी कार्यालय दाङले जनाएको छ ।