राप्ती स्वास्थ्य विज्ञान प्रतिष्ठानमा न्युरो सर्जरी सेवा सुरु
घोराही, ३ चैत । दाङको घोराहीस्थित राप्ती स्वास्थ्य विज्ञान प्रतिष्ठानमा न्युरो सर्जरी सेवा सुरु भएको छ । प्रतिष्ठानमा न्युरो सर्जन डा.उपमा शर्माले आइतवारदेखि सेवा सुरु गर्नुभएको हो ।
लामो समयसम्म कोहलपुर मेडिकल कलेजमा कार्यरत डा. शर्मा प्रतिष्ठानमा आएसँगै सेवा सुरु भएको छ । प्रतिष्ठानमा न्युरो ओपीडी सेवा सञ्चालनमा आएपछि दाङसहित छिमेकी जिल्लाका बिरामीलाई सेवा लिन सहजता हुने अपेक्षा गरिएको छ ।
सेवा सुरुसँगै बिरामीलाई जिल्ला बाहिर जानुपर्ने बाध्यताको अन्त्य भएको राप्ती स्वास्थ्य विज्ञान प्रतिष्ठानले जनाएको छ । प्रतिष्ठानका रजिस्ट्रार प्रा. श्याम लम्सालले प्रतिष्ठानले आफ्नो सेवा विस्तार गर्दै मेडिकल हबको रूपमा विकास भइरहेको बताउनुभएको छ ।
प्रतिष्ठान जिल्लाको स्वास्थ्य सेवा क्षेत्रमा मेरुदण्ड भएकाले भौतिक पूर्वाधार विस्तार र सेवा सुदृढीकरणका लागि सवैले सहयोग गर्न आवश्यक रहेको बताउनुभयो । उहाँका अनुसार प्रतिष्ठानमा छिट्टै मुटुरोग उपचारका लागि क्याथलैब मेसिन ल्याउने तयारी भइरहेको जानकारी दिनुभएको छ ।
मेसिन उपलब्ध भएलगत्तै मुटुरोग विशेषज्ञ समेत नियुक्त गरी सेवा थप विस्तार गर्ने तयारीमा प्रतिष्ठान रहेको बताए ।