पिएम कपमा आर्मी क्लबविरुद्ध मधेश प्रदेश ३ विकेटले विजयी
छवि पुरी
लमही, ६ चैत । लगातार ३ खेलमा हार व्यहोरेको मधेश प्रदेशले नेपाल टेलिकम प्रधानमन्त्री कप एकदिवसीय पुरुष क्रिकेट प्रतियोगितामा त्रिभुवन आर्मी क्लब विरुद्ध ३ विकेटको सानदार जीत हासिल गरेको छ ।
विभागीय टोली त्रिभुवन आर्मी क्लबले दिएको २१८ रनको विजयी लक्ष्य मधेश प्रदेशले ४८ ओभरमा ७ विकेटको क्षतिमा पूरा गर्यो । दाङको लमहीस्थित देउखुरी अन्तर्राष्ट्रिय क्रिकेट रंगशालामा आज त्रिभुवन आर्मी क्लबले दिएको लक्ष्य पछ्याएको मधेश प्रदेशले लगातारको हारको श्रृंखला रोक्दै विभागीय टीम आर्मी विरुद्ध सानदार जीत निकालेको हो ।
मधेश प्रदेशले आज परिपक्व ब्याटिङ गर्दै आर्मी विरुद्ध जीत निकालेको हो । मधेश प्रदेशका निखिल सिंह र रुपेश सिंहले आर्मी विरुद्ध ३९ बलमा ५० रनको साझेदारी गर्दै हारको श्रृंखला अन्त्य गरे । १६९ रनमा ७ विकेट गुमाएको अवस्थामा रहेको मधेशका लागि निखिलले २६ बलमा १ चौकासहित १४ रनमा अविजित रहँदा रुपेश सिंहले २० बलको सामना गर्दै अविजित ३८ रन बनाए । उनले २ छक्का र २ चौकाको मद्दतमा ३८ रन जोड्दा मधेशले आर्मी विरुद्ध जीत निकाल्यो ।
यसैगरी, मधेशका लागि अनिलकुमार साहले आजको खेलमा कप्तानी पारी खेले । तेस्रो विकेटका लागि अनिलले हरिशंकर शाहसँग ७५ रनको साझेदारी गरेपछि मधेशलाई जीतका लागि आधार बनेको थियो । अनिल साह ४८ बल खेल्दै ७ चौकाको मद्दतमा ४५ रन बनाएर बसिर अहमदको बलमा एलबीडब्लु आउट भए । हरिशंकर शाहले ७५ बल सामना गरेर १ छक्कासहित ३७ रन जोडेर नरेश साउदको बलमा स्टम्पिङ आउट भए ।पवन सर्राफ पनि ४३ बल खेल्दै १ छक्का र ३ चौकासहित ३७ रन जोडेर नरेन साउदको बलमा साहब आलमको हातबाट क्याच आउट भए ।
ओपनर मयरन यादव र शैलेन्द्र हालले पहिलो विकेटका लागि २३ रनको साझेदारी गरे । मयन यादवलाई १० रनमा र शैलेन्द्र साह १५ रनमा सोमपाल कामीले आउट गरे । विशाल पटेल ६ रन, दीपेश दास १० रनमा आउट भए । आर्मीका लागि नेरन साउदले १० ओभर बलिङ गर्दै ५४ रन खर्चेर ३ विकेट लिए । सोमपाल कामीले ९ ओभरमा ४९ रन खर्चेर २ विकेट लिँदा बसिर अहमदले पनि १० ओभरमा १ मेडनसहित ३१ रन दिएर २ विकेट लिए । प्रतियोगितामा आर्मी विरुद्ध ३८ रनसहित महत्वपूर्ण २ विकेट लिएका रुपेश सिंह प्लेयर अफ द म्याच भए । यसअघि, विभागीय टोली त्रिभुवन आर्मी क्लबले टस जितेर पहिले ब्याटिङ गर्दै ७ विकेटको क्षतिमा पूरै ओभर खेलेर २१७ रन बनाएको थियो ।
त्रिभुवन आर्मीका भीम सार्कीले सर्वाधिक ८९ रन जोडे । १२६ बलको सामना गरेका भीमले ४ चौकासहित ८९ रन बनाउँदै पवन सर्राफको बलमा एलबीडब्लू आउट भए । अर्धशतक पूरा गर्न उनले ८० बल खेले । पहिलो पावर प्लेमा १ विकेटको क्षतिमा ३९ रन जोडेको आर्मीले दोस्रो पावर प्लेमा पुग्दा थप ३ विकेटको क्षतिमा ११३ रन जोडेको थियो ।
अन्तिम पावर प्लेमा ६५ रन जोडेको आर्मीले ३ विकेट गुमाएको थियो । आर्मीका लागि तृतराज दासले २४ बलमा ३ चौकासहित १४ रन, सन्तोष कार्कीले ५८ बलमा ३ चौकासहित ३३ रन जोडे । कप्तान विनोद भण्डारी २७ बलमा ११ रन बनाएर कमल गुप्ताको बलमा एब्लीडब्लु आउट भए । सोमपाल कामी १ रनमा अनिल साहको हातबाट लङअनका क्याच आउट भए । बसिर अहमद २२ बलमा १० रन, विवेक यादव २१ बलमा १६ रन जोडेर पेभेलियन फर्किएका थिए ।
कुशल मल्लले २० बलमा २ छक्कासहित २४ रनमा अविजित रहँदा नरेन साउद पनि ५ बलमा १ चौकासहित ८ रनमा नटआउट रहे । बलिङ तर्फ मधेशका रुपेश सिंहले ७ ओभरमा १ मेडनसहित ३९ रन दिएर २ विकेट लिए । कमल गुप्ताले १० ओभरमा १ मेडनसहित २२ रन खर्चेर २ विकेट लिए । पवन सर्राफले पनि ५ ओभरमा २२ रन खर्चेर २ विकेट लिए । रञ्जित कुमारले १० ओभरमा १ मेडनसहित ५२ रन दिएर १ विकेट लिए । दाङमा पहिलो पटक आयोजना गरिएको पिएम पुरुष क्रिकेट प्रतियोगितामा अहिलेसम्म ६ खेल खेलीसकेको आर्मी ५ मा जीत र १ मा हार हुँदै १० अंकका साथ दोस्रो स्थानमा यथावत छ भने ५ खेल खेलीसकेको मधेश प्रदेश २ खेलमा जीत र ३ खेलमा लगातार व्यहोर्दै ४ अंकका साथ अंक तालिकाको छैठौँ स्थानमा उक्लिएको छ ।
जारी प्रतियोगितामा यसअघि आर्मीले वाग्मतीलाई १३४ रन, सुदूरपश्चिमलाई ८ विकेट, कर्णालीलाई १२७ रन, कोशीलाई ७ विकेट र एपीएफ क्लबलाई ३ विकेटले हराएको छ । यसैगरी, मधेश प्रदेशले कोशी प्रदेश विरुद्ध १६५ रनले जित्दा बाँकी ३ खेलमा हार व्यहोरेको छ । मधेशले एपीएफसँग २ विकेट, पुलिस क्लबसँग १९३ रन र लुम्बिनी प्रदेशसँग ८३ रनको हार व्यहोरेको छ ।
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगितामा ३ विभागीय टीम आर्मी क्लब एपीएफ क्लब र नेपाल पुलिस क्लबसहित सात प्रदेश टीमले फागुन २५ गतेबाट लुम्बिनी प्रदेशको रुपन्देही र दाङमा प्रतियोगिता खेलीरहेका छन् । तीन खेल मैदानमा भईरहेकोे प्रतियोगिता अन्तरगत रुपन्देहीको सिद्धार्थ रंगशालामा १७ वटा, एक्स्ट्राटेक ओभल क्रिकेट मैदानमा १५ वटा, दाङको लमहीस्थित देउखुरी अन्तर्राष्ट्रिय क्रिकेट रंगशालामा १४ वटा गरि ४६ वटा खेल भईरहेका छन् । जस मध्ये आजसम्म २८ वटा खेल भईसकेका छन् ।