प्लाई उद्योगमा आगलागी नियन्त्रणमा अउन सकेन, बस्ती जोगाउनतिर लागेका छौ : प्रजिअ लम्साल
घोराही, ११ चैत । दाङको घोराही उपमहानगरपालिका–९ खैरामा रहेको सांग्रीला प्लाई तथा भेनियर उद्योगमा लागेको आगो अझै नियन्त्रणमा आउन सकेको छैन ।
आज सोमवार विहान करिव डेढ बजे लागेको आगो अझै नियन्त्रणमा आउन नसकेको प्रहरीले जनाएको छ । आगलागीका कारण उद्योग पूर्ण रुपमा जलेर नष्ट भएको छ । उद्योगमा रातको समयमा विद्युत सट भएर आगलागी भएको प्रारम्भिक अनुन्धानका क्रममा देखिएको जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक चक्रबहादुर शाहले जानकारी दिनुभएको छ ।
प्रहरी नायव उपरीक्षक शाहका अनुसार आगलागीका कारण प्लाई बनाउन प्रयोग हुने काठ, कच्चा पदार्थ, प्लाई बनाउन प्रयोग हुने मेसिनलगायतका सामग्री जलेर नस्ट भएको छ । उद्योगमा आगलागी भएको थाहा पाएपछि नेपाल प्रहरीसहित नेपाली सेना र सशस्त्र प्रहरीको टोली आगो नियन्त्रणका लागि निरन्तर रुपमा लागे पनि उद्योगमा ठुलो आगो सल्किएका कारण नियन्त्रण गर्न समस्या भएको प्रहरी नायव उपरीक्षक शाहले बताउनुभयो ।
आगलागी नियन्त्रणमा खटिनुभएका प्रहरी नायव उपरीक्षक शाहले भन्नुभयो,‘उद्योगको सवै भागमा आगोले भेटाइसकेको छ । करिव ५÷६ वटा दमकल र टेक्याक्टरको सहायताले आगो निभाउने प्रयास गरिरहेका छौ तर नियन्त्रण गर्न सकेका छैनौ ।’ आइतबार उद्योगमा बिदा भएको र कामदार नभएका कारण मानवीय क्षति हुन नपाएको उहाँले बताउनुभयो ।
उद्योगमा लागेको आयो नियन्त्रणसँगै उद्योग नजिकै रहेको बस्तीलाई जोगाउने गरि लागेको प्रमुख जिल्ला अधिकारी कृष्णप्रसाद लम्सालले जानकारी दिनुभएको छ । उद्योगमा निरन्तर आगो लागिरहेको र दिउँसोको समयमा हावाहुरी चल्दा बस्ती समेत जोखिममा रहने भएकाले बस्तीलाई जोगाउने गरि सुरक्षाकर्मीले आगो नियन्त्रणको काम गरिरहेको प्रमुख जिल्ला अधिकारी लम्सालले जानकारी दिनुभएको छ । उहाँले उद्योग वरपर भएका घरहरु जोखिममा रहेको र त्यहाँ क्षति हुन नदिने गरि लागेको बताउनुभयो ।करिव सात विगाह क्षेत्रमा फैलिएको उद्योगमा भएको आलगानी नियन्त्रणका लागि सुरक्षाकर्मी लागिरहेका छन् ।
उद्योगमा लागेको आगो ठुलो भएको र चारैतिर फैलिएका कारण घोराही र तुलसीपुर उपमहानगरपालिकाबाट दमकल आएपनि नियन्त्रणमा ल्याउन नसकिएको प्रहरीले जानकारी दिएको छ । आगो नियन्त्रणका लागि दाङका घोराही र तुलसीपुर उपमहानगरपालिका, लमही नगरपालिकाका तीन वटा दमकलसँगै कपिलवस्तुको शिवराज नगरपालिका र बाँकेको कोहलपुर नगरपालिकाबाट आएका दमकलले आगो नियन्त्रणका लागि प्रयास भइरहेको बताउनुभयो ।
त्यसैगरी उहाँले कपिलबस्तु, रुपन्देही, बाँके र बर्दिया जिल्लामा भएका थप दमकललाई बोलाइएकाले आउँदै गरेको जानकारी दिनुभएको छ । उद्योगमा लागेको आगलागीकावाट करोडौंको क्षति भएको अनुमान गरिएको छ । उद्योगले प्लाई उत्पादन गरेर देशका विभिन्न स्थानसँगै भारत समेत निर्यात गर्दै आएको थियो ।