उवासंघको स्थापना दिवसमा खेलकुद प्रतियोगिता

हिमाल महरा
दाङ,१२ चैत । दाङ जिल्ला उद्योग वाणिज्य संघको ५५औं स्थापना दिवसको अवसरमा मंगलबारदेखि फुटबल प्रतियोगिता सुरु भएको छ ।
दाङ जिल्ला उद्योग बाणिज्य संघका अध्यक्ष वसन्त जोशीको अध्यक्षतामा भएको कार्यक्रममा संघका पूर्व अध्यक्ष भरत बुढाथोकीले प्रतियोगिताको उद्घाटन गरेका थिए । प्रतियोगिताको उद्घाटन गर्दै पूर्वअध्यक्ष बुढाथोकीले व्यवसायीहरूबीच सहकार्य, भाइचाराको सम्बन्ध मजबुत बनाउन खेलकुद महत्त्वपूर्ण हुने बताए ।
खेलकुद प्रतियोगिता उद्घाटन कार्यक्रममा बोल्दै अध्यक्ष जोशीले व्यवसायीहरूबीच एकता, सहकार्य र सामाजिक कार्यलाई अघि बढाउन खेलकुद प्रतियोगिताले सहयोग गर्ने बताए । साथै प्रतियोगिताले खेलका माध्यबाट व्यवसायीलाई अनुशासन, लगनशिल र मित्रताको भावनालाई बलियो बनाउन भूमिका खेल्ने बताए ।
संघका वरिष्ठ उपाध्यक्ष नरेशकुमार श्रेष्ठको स्वागत मन्तव्यवाट सुरुभएको कार्यक्रमको सहजीकरण सचिव विकास वलीले गरेका थिए । स्थापना दिवसका अवसरमा सञ्चालित प्रतियोगिताको पहिलो खेलमा राप्ती अटो इन्जिनियरिङ एसोसिएसन बिजयी भएको छ । एशोसियनले मोबाइल तथा इलेक्ट्रोनिक व्यवसायी संघलाई ६–० गोलको अन्तरले पराजित गरेको हो ।
दोस्रो खेलमा दाङ देउखुरी होटेल व्यवसायी समिति विजयी भएको छ । लुम्बिनी एकेडेमी फुटबल ग्राउन्डमा भएको खेलमा होटेलले दाङ जिल्ला फोटोग्राफर एसोसिएसनलाई ५–२ को गोलले पराजित गरेको हो । फुटबल समितिका संयोजक बिक्रम रानाका अनुसार बुधबार बिहान पहिलो खेल होटेल व्यवसायी समिति र फेन्सी व्यवसायी संघबीच हुनेछ भने दोस्रो खेल राप्ती अटो इन्जिनियरिङ एसोसिएसन र किराना व्यवसायी संघबीच हुने छ ।