बहुभाषिक काव्य उत्सवमा सुनिए सात भाषामा कविता
घाेराही, १६ चैत । राप्ती साहित्य परिषद दाङ शाखाले बहुभाषिक काव्य उत्सव तथा स्रष्टा सम्मान गरेको छ । सात भाषिका स्रष्टाहरूले शनिबार घोराहीमा राप्ती साहित्य परिषद दाङ शाखाले आयोजना गरेको उत्सवमा भाषागत विविधता प्रस्तुत गर्दै एकै थलोमा सात भाषाका साहित्यिक सिर्जना पस्केका हुन् ।
राप्ती साहित्य परिषद दाङ शाखा अध्यक्ष यम रेग्मीको अध्यक्षता तथा वरिष्ठ साहित्यकार एवम् पत्रकार नारायणप्रसाद शर्माको प्रमुख आतिथ्यमा आयोजित कार्यक्रममा स्रष्टाहरुले नेपालको बहुभाषिक, बहुसांस्कृतिक पहिचानलाई मजबुत पार्न समाजको यथार्थतालाई रचनात्मक शैलीमा विभिन्न भाषाका कवितामार्फत सुनाएका छन् ।
कार्यक्रममा संस्कृत, नेपाली, थारू, नेवारी, कुसुण्डा, मगर खाम र अवधि भाषाका स्रष्टाहरूले आफ्ना काव्यहरू सुनाएका हुन् । साहित्यिक समारोहमा पहिलो पटक कुसुण्डाबाट उदय आले र निर्मला कुसुण्डाले कविता सुनाउनुभयो ।
संस्कृत भाषाबाट साहित्यकार उत्तम खतिवडा र जनक पोखरेलले कविता सुनाउँदा नेपालीबाट साहित्यकार नारायण नेपाल र शारदा शर्माले कविता प्रस्तुत गर्नुभयो ।
थारूबाट साहित्यकार छविलाल कोपिला र राजकुमार कान्छाले कविता वाचन गर्दा नेपाल भाषाबाट साहित्यकार नारायणप्रसाद श्रेष्ठ र योगमाया श्रेष्ठले कविता सुनाउनुभयो । अवधिबाट जगतराम यादव र बसन्त प्रकाश यादवले आफ्ना रचना वाचन गर्नुभयो । मगर खाम भाषामा साहित्यकार क्षितिज मगर र कमलप्रसाद गौतमले रचना सुनाउनुभयो ।
एकैथलोमा सात थरीका भाषामा कविता वाचन हुँदा समुदायको आवाज उठाउन र साहित्यिक सिर्जनालाई उजागर गर्न सहयोग पुगेको सहभागीहरुको धारणा छ ।
यसैगरी, कार्यक्रममा लामो समयदेखि साहित्यमा योगदान पुर्याउनुभएको स्रष्टाहरूलाई सम्मान र पुरस्कार पनि प्रदान गरिएको छ । साहित्यकार विनोद पोखरेल, पद्मप्रसाद शर्मा र दीपक शर्मा ‘समीर’ सम्मानित हुनुभयो भने साहित्यकार डा. कृष्णराज डिसी, थारू भाषा साहित्यका अनुसन्धानकर्ता डा. कृष्णराज सर्वहारी र गायक प्रकाश रेग्मी पुरस्कृत हुनुभएको छ ।
सो अवसरमा, प्रमुख अतिथि शर्माले राप्ती साहित्य परिषदले भाषा संरक्षण्सँगै साहित्य उत्थानका लागि गरेको प्रयास अनुकरणीय रहेको बताउनुभयो । उहाँले भाषा, कला, साहित्य र संस्कृति जोगाउन यस प्रकारको अभियानलाई अझ सशक्त बनाएर लैजान पनि आग्रह गर्नुभयो ।
बहुभाषिक काव्य उत्सवले विभिन्न भाषाहरूको संरक्षणमा टेवा पुर्याउन, संस्कृतिको आदानप्रदान गर्न र स्रष्टाहरूलाई मातृभाषामा सिर्जना गर्न प्रेरित गरेको उहाँको भनाई थियो ।
नेपालको बहुजाति, बहुभाषिक र बहुसांस्कृतिक पहिचानलाई उजागर गर्न कार्यक्रमले सघाएको अन्य वक्ताहरुको भनाई थियो ।
कार्यक्रममा सम्मानितहरुका तर्फबाट पद्मप्रसाद शर्मा, दीपक शर्मा समीर, पुरस्कृतका तर्फबाट प्रकाश रेग्मीलगायत साहित्यकार एवम् सर्जकहरुले धारणा राख्नुभएको थियो ।
कार्यक्रममा परिषदको साधारण सभा पनि गरिएको थियो । सो अवसरमा, संस्थाको आर्थिक प्रतिवेदन कोषाध्यक्ष सुशीला आचार्य र सांगठनिक प्रतिवेदन सचिव घनश्याम केसीले प्रस्तुत गर्नुभएको थियो ।
शाखाका उपाध्यक्ष सुरेश कुमार पाण्डेको स्वागत मन्तव्यबाट सुरु भएको कार्यक्रमको सहजिकरण सचिव घनश्याम केसीले गर्नुभएको थियो ।