‘नीतिमा भएपनि व्यवहारमा कार्यान्वन भएन’
दाङ, १६ चैत । त्रिभूवननगर जेसीजको आयोजनामा घोराहीमा ‘स्थानीय सरकारमा महिला सहभागिता ः कानूनी व्यवस्था तथा व्यावहारिक चुनौतीहरू’ विषयक एकदिने कार्यशाला गोष्ठी सम्पन्न भएको छ । त्रिभूवननगर जेसीजका अध्यक्ष जेसी टंक रावत (अनन्त) को अध्यक्षतामा आयोजित कार्यक्रममा प्रमुख अतिथिका रूपमा लुम्बिनी प्रदेश सभा सदस्य लोकाकुमारी विकको प्रमुख आतिथ्यतामा भएको थियो ।
कार्यक्रमका प्रमुख अतिथि विकले महिला सहभागिताको सुनिश्चितता कानूनी रूपमा भए पनि व्यावहारिक रूपमा अझै चुनौतीहरू रहेको बताइन् । उनले स्थानीय तहमा महिलाले नेतृत्वदायी भूमिका निर्वाह गर्न भोग्नुपरेका समस्या समाधानका लागि सबै पक्ष एकजुट भएर लाग्नुपर्नेमा जोड दिइन् । कार्यक्रममा जिल्ला समन्वय समितिका उपप्रमुख चेतना चौधरीले महिलाहरूको सशक्तीकरणका लागि कानूनी व्यवस्थाको प्रभावकारी कार्यान्वयन हुनुपर्ने बताइन् ।
उनले महिला नेतृत्वमा रहे पनि सामाजिक र सांस्कृतिक संरचनाका कारण काम गर्न अप्ठ्यारोमा पारिने प्रवृत्ति हटाउनु आवश्यक रहेको उल्लेख गरिन् । अधिकारकर्मी सूष्मा लामिछानेले कार्यपत्र प्रस्तुत गर्दै कानूनी रूपमा महिलाहरूलाई दिइएको अधिकार र व्यवहारमा आइपर्ने कठिनाइबारे चर्चा गरिन् । उनले नीति निर्माणदेखि कार्यान्वयन तहसम्म महिला प्रतिनिधिहरूको सक्रिय उपस्थितिका लागि कानूनी संरचनाहरूको प्रभावकारी कार्यान्वयन हुनुपर्नेमा जोड दिइन् ।
प्रस्तुत कार्यपत्रमाथि महिला अधिकारकर्मी बिमला योगी, पत्रकार रन्जिता अधिकारी र अधिवक्ता विनु श्रेष्ठले विचार राखेका थिए । उनीहरूले कानूनी संरचनाहरू प्रभावकारी कार्यान्वयन गर्न महिला नेतृत्वलाई सशक्त बनाउने तालिम, स्रोत साधनको उपलब्धता र सहजीकरण आवश्यक रहेको बताएका थिए ।
कार्यक्रममा घोराही उपमहानगरपालिका उपप्रमुख हुमाकुमारी डिसी, लमही नगरपालिका उपप्रमुख लक्ष्मी योगी, बंगलाचुली गाउँपालिका उपाध्यक्ष भक्तबहादुर जिसी र शान्तिनगर गाउँपालिका उपाध्यक्ष प्रेमाकुमारी बुढाथोकीको सहभागिता रहेको थियो । स्थानीय तहका महिला जनप्रतिनिधिले आआफ्नो अनुभव बाँड्दै नीति तथा कानूनी संरचनामा भएका केही अप्ठ्यारा पक्ष सुधार गर्नुपर्ने धारणा राखेका थिए ।
कार्यक्रममा दाङ महिला जेसीजकी संस्थापक अध्यक्ष निर्मला गौतम, दाङ महिला जेसीजका अध्यक्ष अनिता ढकाल, निवर्तमान अध्यक्ष जुनकुमारी बुढा, त्रिभूवननगर जेसीजका पूर्वअध्यक्षहरू निशान्त आचार्य, दीपक शर्मा, विवेक आचार्य, पत्रकार आरके शीतल, गोविन्द खड्कालगायत विभिन्न क्षेत्रका प्रतिनिधिहरूको उपस्थिति रहेको थियो । कार्यक्रम संयोजक श्यामकुमार गिरीको स्वागत मन्तव्यबाट सुरु भएको कार्यक्रमको सहजीकरण महासचिव जेसी कृष्णदेव थापाले गरेका थिए ।