पुल निर्माणमा ढिलाइ, एक वर्षमा २५ प्रतिशत
दाङ, ४ भदौ । निर्माण व्यवसायीका कारण पुल निर्माणमा ढिलाइ भएको छ । दाङको गहते खोला–बाघमारे–पुरन्धारा सडक खण्ड अन्तर्गत पातेटाकुरा खोलामा पुल निर्माणमा ढिलाइ भएको हो ।
पुल निर्माणका लागि ठेक्का सम्झौता भएको आधा बढी समय बितिसक्दा पनि निर्माण व्यवसायीको ढिलाइका कारण २५ प्रतिशत मात्र पुल निर्माण कार्य भएको छ । तुलसीपुर उपमहानगरपालिका–१ र शान्तिनगर गाउँपालिका–३ नम्बर वडालाई जोड्ने गरी पातेटाकुरा खोलामा निर्माणाधीन पुलको एक वर्षको अवधिमा करिब २५ प्रतिशत भौतिक प्रगति भएको छ ।
२० मिटर लम्बाई र १० मिटर चौडाइ रहेको पक्की पुल २०८२ पुस १५ गतेभित्र निर्माण सक्ने गरी २०८१ असार १६ गते प्रेमा कन्स्ट्रक्सन र सप्लायर्स प्रालि मोरङ्सँग ठेक्का सम्झौता भएको थियो । भ्याटसहित चार करोड १० लाख ४४ हजार रुपैयाँमा ठेक्का लागेको पुलको अहिलेसम्म २५ प्रतिशत भौतिक र १६ दशमलव ३७ प्रतिशत वित्तीय प्रगति भएको सडक पूर्वाधार विकास कार्यालय दाङका इन्जिनियर प्रशान्तकुमार इसरले जानकारी दिएका छन् ।
इन्जिनियर इसरका अनुसार अहिले पुल निर्माण अन्तर्गत फाउन्डेसन निर्माणको काम भइरहेको छ । फाउन्डेसन निर्माण गर्दा बढी समय लाग्ने भएकाले पुलको भौतिक प्रगति अहिले कम देखिएको भन्दै इन्जिनियर इसरले भने, ‘पुलको फाउन्डेसन निर्माण गर्दा समय बढी लाग्छ । अहिले पातेटाकुरा खोलामा फाउन्डेसन निर्माण भइरहेको छ । फाउन्डेसन सकिएपछि स्टक्चर निर्माणको काम चाँडै हुनेछ ।’
ठेक्का सम्झौता अनुसार पुल निर्माणको काम सन्तोषजनक रहेको भन्दै इन्जिनियर इसरले पुल निर्माणमा ढिलाइ नहुने बताउँछन् । सम्झौता मितिमै पुल निर्माण सक्ने गरी काम भइरहेको भन्दै उनले भने, ‘निर्माण व्यवसायीले वर्षाको समयमा पनि पुलको फाउन्डेसन निर्माण अन्तर्गत पाइलिङको काम गरिरहेको छ ।
फाउन्डेसनको काम सकिएपछि पुलको स्ट्रक्चर निर्माणले गति लिनेछ ।’ निर्माण व्यवसायीले नियमित काम गरिरहेकाले पुसमा सकिने काम एक÷दुई महिना ढिलो हुनसक्ने तर त्योभन्दा ढिलो नहुने इन्जिनियर इसरले बताएका छन् । पुल निर्माण भएपछि शान्तिनगर गाउँपालिका अन्तर्गत पातेटाकुरा, चिराघाट, जुम्लेकुला, बाघमारे गाउँलगायतका स्थानीयलाई तुलसीपुर बजार आउजाउमा सहज हुने शान्तिनगर गाउँपालिका–३ पातेटाकुरा निवासी जितबहादुर केसी बताउँछन् ।
उनका अनुसार खोलामा पुल नहुँदा अहिले वर्षा हुँदा खोला वारपार गर्न समस्या भए पनि पुल बनेपछि सहज हुनेछ । पुल निर्माणमा भइरहेको ढिलाइका कारण समयमा निर्माण हुन्छ कि हुँदैन भन्ने स्थानीय आशङ्का उत्पन्न भएको बताए ।