इन्टर बैंकर्स फुटसलको उपाधी तुलसीपुर बैंकर्सलाई
असार १६, २०८०
लक्ष्मण बस्नेत
घोराही,१६ असार । इन्टर बैंकर्स क्लबस्तरीय फुटसल प्रतियोगिता–२०८० को उपाधी तुलसीपुर बैंकर्स क्लबले जितेको छ ।
तुलसीपुर बैंकर्स क्लबको आयोजनामा द लेजेन्ड फुटसल ग्राउन्ड तुलसीपुरमा भएको फाईनल खेलमा देउखुरी बैंकर्सलाई दुईका विरुद्ध सात गोलको फराकिलो अन्तरले पराजित गर्दै तुलसीपुर बैंकर्सले उपाधी जितेको हो ।
उपाधीसंगै उसले इन्टर बैंकर्स क्लबस्तरीय फुटसलको कप उचालेको छ । प्रतियोगितामा तुलसीपुर, घोराही र देउखुरी बैंकर्स क्लबका चार टिमको सहभागिता रहेको थियो ।
प्रतियोगिताको समापन तथा पुरस्कार वितरण कार्यक्रम तुलसीपुर बैंकर्स क्लबका अध्यक्ष रन्जन कोईरालाको अध्यक्षतामा भएको थियो । सो अबसरमा बिजेता तुलसीपुर बैंकर्स, उपबिजेता देउखुरी बैंकर्स क्लबका टिम तथा खेलाडीलाई कप, मेडल, प्रमाणपत्र र देउखुरी बैंकर्स क्लबका रबिन भट्टराईलाई उत्कृष्ट किप्परको ट्रफी प्रदान गरिएको थियो ।
