दृष्टिविहीन बालिका बलात्कार गरेको आरोपमा एक जना पक्राउ

---

देउखुरी, १७ भदौ । दाङको देउखुरीमा दृष्टिविहिन बालिका बलात्कार गरेको आरोपमा एक जना पक्राउ परेका छन् । राप्ती गाउँपालिका २ मा रहेको आदर्श नमुना माद्यमिक विद्यालयभित्र एक दृष्टिविहीन बालिका बलात्कार गरेको आरोपमा एक जना पक्राउ परेका हुन ।

आदर्श माध्यमिक विद्यालयमा अध्ययन गर्ने दृष्टिविहीन १३ वर्षीया बालिका बलात्कार गरेको आरोपमा प्रहरीले आर्दश विद्यालयका कार्यालय सहयोगी तथा बसका सह–चालक रामबहादुर खनाललाई पक्राउ गरेको हो । उनलाई आइतबार बिहान करिब ८ बजे विद्यालयबाट पक्राउ गरिएको इलाका प्रहरी कार्यालय भालुवाङका प्रमुख प्रहरी निरीक्षक उज्वल बहादुर सिंहले जानकारी दिएका छन ।

प्रहरी निरीक्षक सिंहका अनुसार खनालले गत भदौ ४ गते बालिकामाथि बलात्कार गरेको प्रहरीमा जाहेरी परेको छ । बालिका सोही विद्यालयको दृष्टिविहीन कक्षामा पढ्दै आएकी छिन । विगत पाँच वर्षदेखि सोही विद्यालयको होस्टेलमा बस्दै आएकी बालिकालाई भान्सा कोठामा लगेर खनालले बलात्कार गरेको प्रहरी स्रोतले जनाएको छ । प्रहरीका अनुसार आरोपलाई सरकारी वकिल कार्यालय लैजाने तयारी रहेको छ ।