पाँचौ हापुर कप फुटबल प्रतियोगितामा घोराही–८, बुद्ध स्पोर्ट्स र सल्यान एफसी बिजयी
फाल्गुन ३, २०८०
भ्यूमान पुन
घोराही,३ फागुन । घोराही उपमहानगरपालिका–१२ हापुरमा सञ्चालित पाँचौ हापुर कप फुटबल प्रतियोगितामा घोराही–८,बुद्ध स्पोर्ट्स र सल्यान एफसी बिजयी भएका छन् ।
घोराही उपमहानगरपालिका–१२ हापुर बिजौरी खेल मैदानमा जारी प्रतियोगिताको तेश्रो दिनको पहिलो खेलमा घोराही उपमहानगरपालिका वडा नं. ८ को टिम बिजयी भएको छ । घोराही–८ र गुर्जे एफसीबिच भएको खेलमा घोराही–८ को टिम ३–० ले बिजयी भएको हो । घोराही ८ को जितका लागि खेलाडी सुशील चौधरीले २ र रामबहादुर ठकुरीले १ गोल गरेका थिए ।
त्यसैगरी प्रतियोगिताको दोश्रो खेलमा बुद्ध स्पोर्ट्स क्लब बिजयी भएको छ । बुद्ध स्पोर्टुस क्लवले बटलपुर एफसीलाई २–० ले पराजित गरेको आयोजक हापुर युथ क्लवका अध्यक्ष बिनोद विकले जानकारी दिएका छन् । अध्यक्ष विकका अनुसार बुद्ध स्पोर्ट्सको जितका लागि खेलाडी युबराज राना र निर्देश मगरले समान १÷१ गोल गर्न सफल भएका थिए ।
विहीवार भएको अन्तिम खेलमा सल्यान टेक.एफसीले मेगा क्लब घोराहीलाई ३–१ गोल अन्तरले पराजित गरेको छ । सल्यानको जितका लागि बासुदेब चलाउने १ र प्रकाश बोहराले २ गोल गरेका थिए भने मेघा क्लव घोराहीकातर्फबाट लेमन डिसीले एक गोल मात्र गर्न सफल भएका थिए ।
प्रतियोगितामा बिजेता टिमले नगद ५० हजार ५सय ५५ शिल्ड, मेडल र प्रमाणपत्र र उपबिजेता टिमलाई नगद २० हजार ५ सय ५५ शिल्ड, मेडल र प्रमाणपत्र गर्नेछ । प्रतियोगितामा विधागततर्फ उत्कृष्ट हुने खेलाडीहरुलाई पुरस्कार प्रदान गर्ने आयोजक हापुर युथ क्लवले जनाएको छ । प्रतियोगितामा जिल्लाभरका २७ फुटबल टिम सहभागी भएका छन् । यहि फागुनको १ गतेदेखि सुरुभएको प्रतियोगिता फागुनको १० गतेसम्म सञ्चालन हुने छ ।
