शुभलक्ष्मीकाे कार्यविधि माथि छ्लफलसहित परिचयात्मक वनभोज कार्यक्रम सम्पन्न
घाेराही,२४ चैत । घोराही उपमहानगरपालिका ६ गुरुवागाउँमा रहेको शुभलक्ष्मी बचत तथा ऋण सहकारी संस्थाले कार्यविधिमाथि छ्लफल तथा परिचयात्मक वनभोज कार्यक्रम गरेको छ ।
सहकारीको शिक्षा उपसमिति संयोजक कृष्णकुमार न्यौपानेको अध्यक्षतामा घोराही -१३ बाह्रकुने दहमा शनिबार कार्यक्रम भएको हाे ।
कार्यक्रममा संस्थाको भएका कामको बारेमा संस्थाका अध्यक्ष शरदकुमार आचार्यले जानकारी गराउनु भएको थियो । १८ औं अधिवेशनबाट निर्वाचित कार्यसमितिले संस्थाका शेयर सदस्यहरुसँग परिचयात्मक कार्यक्रम पनि गरेको थियोे । साे अवसरमा २०८१ सालको भित्तेपात्रो समेत विमोचन गरेको थियो । कार्यक्रममा जिल्ला सहकारी संघ लिमिटेड दाङका अध्यक्ष हेमराज गाैतमले जिल्लामा संचालित सबै सहकारीहरु सहकारी सिद्धान्त अनुसार चल्नुपर्ने र प्रविधिमैत्री हुनुपर्ने बताउनुभयो । उहाँले शुभलक्ष्मी सहकारीबाट अहिलेसम्म सहकारीकाे सिद्धान्त अनुसार चल्दै राम्रो काम गर्दै अाएकाे र आगामी दिनमा पनि राम्रो गरोस् भन्ने शुभकामना दिनुभयो ।
कार्यक्रमकाे अवसरमा संस्थाका सदस्यहरुको बिचमा कुर्सी दौड प्रतियोगिता गराइएको थियो। जसमा युवक शर्मा प्रथम, चन्द्रावती न्यौपाने द्वितीय र टीका डाँगी तृतीय हुनुभएको थियो । विजेता तीनै जनालाई नगद पुरस्कार प्रदान गरिएको थियोे ।
शिक्षा उपसमिति सदस्य पूर्णबहादुर चौधरीको स्वागत मन्तव्यबाट शुरु भएको कार्यक्रमको सहजीकरण शिक्षा उपसमिति सदस्य रञ्जिता अधिकारीले गर्नुभएको थियोे ।