बाढी-पहिरोमा परी देशभर ११२ को मृत्यु, ६८ बेपत्ता !
घाेराही, १३ असाेज । लगातारको अविरल वर्षासँगै आएको विपद्ले देशभरि ठूलो क्षति निम्त्याएको छ । बाढीपहिरो र डुबानका कारण शनिबार रातिसम्म ११२ जनाले ज्यान गुमाइसकेका छन् भने ६८ जना अझै बेपत्ता छन् ।
विभिन्न जिल्लाहरूमा विपद्का कारण कम्तीमा १०० भन्दा बढी व्यक्ति घाइते भएका छन् । मुलुकभरका धेरैजसो क्षेत्रमा सडक, पुल र विद्युत्का संरचनामा समेत व्यापक क्षति पुगेको छ, जसले गर्दा जनजीवन प्रभावित भएको छ । जल तथा मौसम विज्ञान विभागका अनुसार काठमाडौं उपत्यकामा शनिबार ५४ वर्षयताकै सबैभन्दा धेरै वर्षा भएको हो ।
विभागले २४ घण्टामा ३२३ मिलिमिटर पानी मापन गरेको छ, जुन ऐतिहासिक रूपमा उच्च मानिएको छ । यो अविरल वर्षाले काठमाडौं उपत्यकामा मात्रै बाढी र पहिरोबाट ३७ जनाको मृत्यु भएको छ भने २० जना अझै बेपत्ता छन् ।
सुरक्षा निकायहरूबाट प्राप्त विवरणअनुसार काभ्रे जिल्लामा सबैभन्दा धेरै ३४ जनाको ज्यान गएको छ भने ललितपुरमा २०, धादिङमा १५, काठमाडौंमा १२ र मकवानपुरमा ७ जनाले ज्यान गुमाएका छन् । पाँचथर र भक्तपुरमा ५/५ जनाको मृत्यु भएको छ भने सिन्धुपाल्चोक र दोलखामा ४ र ३ जनाको मृत्यु भएको छ । अन्य प्रभावित जिल्लाहरूमा धनकुटा, सोलुखुम्बु, रामेछाप, महोत्तरी, सुनसरीलगायतका जिल्लाहरू छन्, जहाँ जनधनको क्षति भएको छ ।
बेपत्ता भएकाहरूको खोजीकार्य जारी छ र सुरक्षाकर्मीहरू उद्धारमा जुटेका छन् । पाँचथर, झापा, महोत्तरी, सिन्धुली, सिन्धुपाल्चोक, काभ्रे र काठमाडौंलगायतका १२ भन्दा बढी जिल्लाहरूमा बेपत्ता भएकाहरूको सङ्ख्या ६८ पुगेको छ ।
सरकारले देशभर उद्धार र राहत कार्यलाई तीव्रता दिएको छ भने प्रभावित क्षेत्रका जनतालाई सुरक्षित स्थानमा सार्ने कार्य भइरहेको छ । मौसम विभागले अझै केही दिन वर्षा जारी रहने पूर्वानुमान गरेकोले जनतालाई सतर्क रहन आग्रह गरेको छ । यो विपद्का घटनाले मुलुकका धेरैजसो ग्रामीण तथा शहरी क्षेत्रहरूमा गहिरो असर पारेको छ, जसले पुनर्निर्माण र पुनर्स्थापना कार्यलाई चुनौतीपूर्ण बनाएको छ ।