मावि रझेनालाई उपमेयर कप छात्रा भलिबलको उपाधि
घोराही, २२ मंसिर । घोराहीमा भएको अन्तरविद्यालयस्तरीय उपमेयर कप छात्रा भलिबल प्रतियोगिता–२०८१ को उपाधि साविक विजेता माध्यमिक विद्यालय रझेनाले जितेको छ ।
घोराही उपमहानगरपालिका खेलकुद विकास समितिको आयोजनामा भएको प्रतियोगितामा शनिबार भएको फाईनल खेलमा मावि रझेनाले पद्मोदय पब्लिक नमूना मावि भरतपुरलाई ३–० को सोझो सेटमा हराउँदै लगातार दोस्रो पटक उपाधि जितेको हो ।
घोराही उपमहानगरपालिका–१५ सहिद मञ्चमा भएको फाइनल खेलमा मावि रझेनाले पद्मोदयलाई २५–११, २५–२३ र २५–१३ को सोझो सेटमा पराजित गरेको थियो । गत वर्ष भएको प्रतियोगितामा पनि पद्मोदय मावि भरतपुरलाई हराउँदै मावि रझेनाले उपाधि जितेको थियो ।
तीन दिनसम्म भएको प्रतियोगिताको विजेता बनेको मावि रझेनाले नगद ५० हजार, कप, ट्रफी तथा उपविजेता पद्मोदय माविले नगद २५ हजार र मेडल प्राप्त गरेको छ । प्रतियोगितामा तेश्रो भएको ज्ञानसिन्ध माविलाई मेडल,ट्रफिसहित प्रमाणपत्र प्रदान गरिएको थियो । प्रतियोगिताको सर्वोत्कृष्ट खेलाडी मावि रझेनाकी सुनिता बुढा मगर घोषित भइन । प्रतियोगितामा घोराही नगर क्षेत्रका आठ सामुदायिक र दुई संस्थागत गरी १० विद्यालयको सहभागिता रहेको थियो ।
प्रतियोगिताका बिजेता खेलाडीलाई पुरस्कार वितरण गर्दै उपप्रमुख हुमा डिसीले खेलकुदमा महिलाको उपस्थिति बढाउँदै दक्ष नागरिक उत्पादनका लागि खेलकुदका प्रतियोगिताहरु सञ्चालन गर्न आवश्यक रहेको बताइन । पालिकाले खेल समिति गठन गरेर व्यवस्थित रुपमा खेलकुदका गतिविधि संचालन गरेर घोराहीलाई खेलकुदको हब बनाउने अभियानमा अघि बढेको बताइन ।
घोराही नगर खेलकुद विकास समितिका अध्यक्ष नरेन्द्र पुनको अध्यक्षतामा भएको समापन समारोहको सहजीकरण नगर खेलकुद विकास समिति सदस्य श्रवणकुमार खनालले गरेका थिए ।