जिल्लास्तरीय तेक्वान्दो प्रतियोगिता सम्पन्न
दाङ, २४ मङ्सिर । घोराहीमा तेस्रो दाङ जिल्लास्तरीय तथा दोस्रो ध्वजबहादुर केसी स्मृति तेक्वान्दो प्रतियोगिता–२०८१’ को समापन गरिएको छ । घोराही तेक्वान्दो डोजाङको आयोजनामा दुई दिनसम्म चलेको प्रतियोगिताको समापन गरिएको हो ।
घोराही तेक्वान्दो डोजाङका प्रमुख वीरु भाइ बज्राचार्यको अध्यक्षता तथा घोराही उपमहानगरपालिका वडा नम्बर १५ का वडाध्यक्ष रमेशकुमार पाण्डेको प्रमुख आतिथ्यतामा समापन गरिएको थियो । प्रतियोगितामा जिल्लाभित्रका २१ डोजाङका चार सय २५ खेलाडी सहभागी भएको प्रतियोगितामा उत्कृष्ट पुरुष खेलाडीमा यस बुढाथोकी र महिला उत्कृष्ट खेलाडीतर्फ खुसी बुढा मगरलाई सम्मान गरिएको थियो । प्रतियोगितामा खेलाडीले २२ केजी, २५ केजी, २८ केजी, ३१ केजी, ३४ केजी, ३७ केजी, ३९ केजी, ४२ केजी, ४५ केजी, ४८ केजी र ५१ केजीमुनि तौल समूहमा महिला र पुरुष खेलाडीले प्रतिस्पर्धा गरेका थिए ।
कार्यक्रमका प्रमुख अतिथि पाण्डेले स्वास्थ्यसँगै आत्मसुरक्षाका लागि तेक्वान्दो खेल हरेक व्यक्तिका लागि अत्यन्त आवश्यक रहेको बताए । उनले दाङमा तेक्वान्दोको विकासका लागि आफ्नो वडाको तर्फबाट सक्दो सहयोग गर्ने बताए । मङ्सिर २१ र २२ गते दुई दिनसम्म चलेको प्रतियोगिताको निर्णायकमा रेफ्री बिमला भण्डारी र नेत्र थापाको नेतृत्वमा १६ जना रहेका थिए ।
प्रतियोगिता समापन कार्यक्रममा दाङ जिल्ला तेक्वान्दो संघका अध्यक्ष विष्णु अधिकारी, बरिष्ठ उपाध्यक्ष तिलक झाँक्री मगर, विभिन्न डोजाङका प्रमुख र खेलाडीहरूको सहभागीता रहेको थियो । कार्यक्रमको सहजीकरण जिल्ला खेलकुद विकास समिति दाङका तेक्वान्दो प्रशिक्षक राकेश परियारले गरेका थिए ।