नियम विपरित जाने इट्टा उद्योगलाई कारवाहीको माग
दाङ,२९ मंसिर । दाङ देउखुरी इट्टा व्यवसायी समितिले नियम विपरित जाने उद्योगलाई कारवाहीको माग गरेको छ । समितिले शनिवार घोराहीमा पत्रकार सम्मेलनको आयोजना गरेर सरकारको निर्णय अनुसार पुसको मसान्तपछि मात्र इट्टा उद्योगहरुले इट्टा पोल्ने कार्य सुरु गर्नुपर्ने भएपनि तुलसीपुर उपमहानगपालिका–१८ मा रहेको हनुमान इटा उद्योगले मंसिरको २८ गतेदेखि नै इट्टा पोल्ने कार्य सुरु गरेको भन्दै कारवाहीको माग गरेको हो ।
सरकारले बनाएको नियम देशभरका इट्टा उद्योगहरुमा समान रुपमा लागु हुनुपर्ने भन्दै दाङ देउखुरी इट्टा व्यवसायी समितिका अध्यक्ष रोम वलीले नियम विपरित जाने उद्योगलाई कारवाही गर्नुपर्ने माग गरेका छन् । अध्यक्ष वलीका अनुसार २०८१ कात्तिक ३० गतेका दिन औद्योगिक व्यवसाय ऐनको दफा २० उपदफा १० अनुसार उद्योग तथा आपुर्ती मन्त्रीको अध्यक्षमा बसेको औद्योगिक तथा लगानी प्रवद्र्धन बोर्डको २४३ औं बैठकले इट्टा उद्योगबाट हुने प्रदूषण न्यूनीकरण एवं कामदारको स्वास्थ्यलाई ध्यान दिदै इट्टा पोल्ने कार्य प्रत्येक बर्षको पुस मसान्तपछि मात्र सुुरु गर्ने निर्णय गरेको थियो ।
सरकारले गरेको निर्णय विरुद्ध जाने उद्योगलाई कारवाहीको दायरामा ल्याउन नेपाल इट्टा उद्योग व्यवसायी महासंघका केन्द्रीय सदस्य किरणकुमार रेग्मीले बताए । एक उद्योगका कारण समग्र इट्टा व्यवसायीमाथि असर गर्ने काम गरेको भन्दै कानुन कार्यान्वयन गराउने निकायलाई गम्भीरतापूर्वक ध्यान दिन आग्रह गरे । ‘एउटा उद्योगलाई छुट हुँदा भोली अरु उद्योगहरुले पोल्न सुरु गर्न सक्छन्’, केन्द्रीय सदस्य रेग्मीले भने,‘जसले गर्दा चिसो मौषममा बढी प्रदूषण हुन सक्छ । प्रदूषण रोक्नका लागि सरकारले गरेको निर्णय कार्यान्व्य गराउन आवश्यक छ ।’
सरकारले गरेको निर्णय विपरित जाने इटा उद्योगलाई तत्काल कारवाही गर्नुपर्ने दाङ देउखुरी इट्टा व्यवसायी समितिका सल्लाहकार सन्तोष डाँगीले बताए । उद्योगले इट्टा पोल्न सुरु गरेको बारेमा समितिले जिल्ला प्रशासन कार्यालय, जिल्ला प्रहरी कार्यालयसँगै लुम्बिनी प्रदेशका उद्योग, पर्यटन तथा यातायात मन्त्री प्रचण्डविक्रम न्यौपानेलाई पनि जानकारी गराइसकेको बताएका छन् ।