खेलकुद प्रशिक्षक उत्पादन गर्न घोराहीमा ‘एन्फा कम्यूनिटी कोचिङ कोर्ष’ हुँदै
घोराही, ६ माघ । दाङको घोराही उपमहानगरपालिका अन्तरगत रहेको नगर खेलकुद विकास समितिले खेल प्रशिक्षक उत्पादन गर्ने तयारी गरेको छ ।
वार्षिक खेलकुद कार्यक्रम अनुसार घोराहीमा दक्ष फुटबल प्रशिक्षक उत्पादन गर्न माघ १० गते देखि १४ गतेसम्म पाँच दिने एन्फा कम्यूनिटी कोचिङ कोर्ष आयोजना गर्न लागिएको नगरस्तरीय खेलकुद विकास समिति संयोजक नरेन्द्र पुनले जानकारी दिनुभयो ।
घोराहीका १९ वटै वडामा दुई–दुई जना खेलकुद प्रशिक्षक उत्पादन गर्न एन्फाको स्वीकृतिमा माघ १० गतेदेखि घोराहीमा एन्फा कम्युनिटी कोचिङ कोर्ष संचालन गर्ने तयारी भएको संयोजक पुनले बताउनुभयो ।
फिफा र एएफसीबाट लाईसेन्स मान्यता प्राप्त एन्फा कम्युनिटी कोचिङ कोर्ष पूरा भएमा घोराहीका हरेक वडामा तालिम प्राप्त फुटबल प्रशिक्षक हुने अपेक्षा गरिएको छ । यसले फुटबलको विकासमा टेवा पुग्ने विश्वास गरिएको छ । यसका लागि माघ ६ गते आईतबारसम्म नाम दर्ता गर्न आयोजकले अपिल गरिसकेको छ ।
फिफा र एएफसीबाट लाईसेन्स प्राप्त एन्फा प्रशिक्षकद्वारा प्रशिक्षण गराईने हुँदा हरेक वडाबाट कम्तीमा २ जना फुटबल प्रशिक्षक अनिवार्य गराउनु पर्ने गरी वडामा पत्राचार गरिएको पनि संयोजक पुनले बताउनुभयो ।
एन्फा कम्यूनिटी कोचिङ कोर्षको प्रशिक्षण लिन ९ हजार शुल्क तोकिएको छ । यसका साथै एक सेट जर्सी र एक सेट ट्रयाक उपलब्ध गराईने, तालिम अवधिभर. बिहानको खाजा र खानाको सुविधा रहने तर बेलुकीको खाना, खाजा तथा बस्ने व्यवस्था स्वयंले गर्नुपर्ने आयोजकले जनाएको छ ।
खेलकुद विकास समितिले एन्फा कम्युनिटी कोचिङ कोर्षका लागि सम्पर्क व्यक्तिका रुपमा खेलकुद विकास समिति संयोजक नरेन्द्र पुन ९८५७८५६७८९, गोपाल कुँवर ९८५७८४१६९९ र इराक घर्ती ९८५७८३२१३५ लाई तोकिएको छ ।
घोराही उपमहानगरपालिका नगर खेलकुद विकास समिति सञ्चालन कार्यविधि २०७९ अनुसार घोराहीमा २०८० जेठ २४ गते नरेन्द्र पुन घाेराही नगर खेलकुद विकास समितिको संयोजकमा नियुक्त भएसँगै पालिकामा खेलकुदको विकासका लागि योजनावद्ध ढंगले तालिका अनुसार खेलकुदका गतिविधि संचालन हुने गरेको छ ।