चोरीका घटना राेक्न नागरिक समाजको ध्यानाकर्षण
घोराही, ११ माघ । नागरिक समाज दाङले जिल्लामा बढ्दै गइरहेका चोरीका घटना न्युनीकरण प्रभावकारी बनाउन प्रहरी प्रशासनको गम्भीर ध्यानाकर्षण गराएको छ । समाजका संयोजक निमबहादुर थापा र सचिव नारायणप्रसाद श्रेष्ठले शुक्रबार एक विज्ञप्ति जारी गर्दै पछिल्लो समयमा दाङका विभिन्न स्थानमा भएका चोरीका घटनाले स्थानीय नागरिकमा असुरक्षा बढाएको भन्दै न्यूनीकरण प्रभावकारी बनाउन ध्यानाकर्षण गराउनुभएको हो ।
घोराही, तुलसीपुर, लमहीलगायतका स्थानमा भएका चोरीका पछिल्ला घटनाहरूलाई मध्यनजर गर्दै प्रहरी प्रशासनले केही कदम चालेको बताइए पनि ती कदम पर्याप्त नभएको स्थानीय बासिन्दाको गुनासो छ । चोरीका घटनाहरूको यथाशीघ्र अनुसन्धान गरी दोषीमाथि कानूनी कारबाही नगरेसम्म चोरीका घटनाले समुदायमा असुरक्षा बढ्दै जाने समाजले ठहर छ ।
विज्ञप्तिमा प्रहरीले यस्ता घटनालाई नियन्त्रण गर्न चालेका कदमहरू प्रभावकारी नभएको र थप सक्रियता अपनाउनुपर्ने ध्यानाकर्षण गरिएको छ । जिल्लामा पछिल्लो समय चोरीका घटना तीव्र रुपमा बढ्दै जाँदा स्थानीय समुदायमा डर र त्रासको वातावरण सिर्जना भएको भन्दै शान्ति सुरक्षा मजबुत बनाउँदै नागरिकमा सुरक्षाको प्रत्याभूति दिलाउन माग समेत गरिएको छ ।
नागरिक समाजले प्रहरी प्रशासनलाई चोरीका घटनामा संलग्न व्यक्तिहरूलाई छिटोभन्दा छिटो पक्राउ गरी कडा कानूनी कारबाही गर्न समेत अपिल गरेको छ । साथै, समाजले चोरीका घटना रोक्नका लागि स्थानीय बासिन्दा, प्रहरी प्रशासन र अन्य सरोकारवाला निकायबीच समन्वय बढाउनुपर्ने आवश्यकता औंल्याएको छ । चोरीका घटना न्यूनीकरण गर्न समुदायमा सचेतनाका कार्यक्रम गर्न, टोल विकास संस्थालाई सक्रिय बनाउन समेत आग्रह गरेको छ ।
यसैगरी, स्थानीय सुरक्षा समिति गठन गरी चोरी नियन्त्रणका उपायहरूमा समुदायलाई सहभागी गराउन, प्रहरी गस्तीलाई नियमित र प्रभावकारी बनाउन, सीसीटीभी जस्ता प्रविधिको प्रयोगलाई बढावा दिन र जनचेतना अभियान सञ्चालन गर्न समेत सरोकार सबैलाई नागरिक समाज दाङले सचेत गराएको छ ।