Ad Area

अध्यक्ष कप फुटबलको उपाधीका लागि वडा न ६ र ८ भिड्ने


लक्ष्मण बस्नेत
तुलसीपुर, २४ माघ । दाङको तुलसीपुरमा जारी सर्वाधिक राशीको अध्यक्ष कप अन्तर वडास्तरीय रनिङ फुटबल प्रतियोगिता २०८१ को उपाधिका लागि वडा न ६ र ८ भिड्ने भएका छन् ।

तुलसीपुर उपमहानगरपालिका वडा न ६ को आयोजना तथा युथ अफ तुलसीपुर र मदन भण्डारी स्पोर्ट्स क्लबको सहकार्यमा अरनिको मैदान तुलसिपुरमा संचालित प्रतियोगिताको फाईनल खेल भोली शुक्रबार बिहान ११ बजेदेखि सुरु हुनेछ । बिहिवार सम्पन्न पहिलो सेमिफाइनल खेलमा वडा न १८ लाई ३–० गोलले पराजित गर्दै वडा न ६ ले फाईनल यात्रा तय गरेको हो । उता वडा न ३ लाई ट्राईबेकरमा पराजित गर्दै वडा न ८ ले वडा न ६ संगको फाईनल भिड्न्त पक्का गरेको हो ।

कडा प्रतिस्पर्धात्मक दोस्रो सेमिफाइनल खेलको निर्धारित समयसम्म ३–३ गोलको बराबरी भएपछी खेलको नतिजा ट्राइबेकरबाट निकालिएको थियो । प्रतियोगिताको बिजेताले नगद २ लाख ६६ हजार ६ सय ६६ र चाँदीको रनिङ शिल्ड प्राप्त गर्नेछ भने उपबिजेता हुने टिमले १ लाख ६६ हजार ६ सय ६६ नगदसहित कप, मेडल र प्रमाणपत्र प्राप्त गर्ने छन् ।

त्यस्तै ब्यक्तिगत बिधातर्फ सर्वोत्कृष्ट हुने खेलाडीलाई नगद ८ हजार ट्रफी प्रमाणपत्र प्रदान गरिनेछ । त्यस्तै उत्कृष्ट गोल्किपर,सर्वाधिक गोलकर्ता, उत्कृष्ट गोल रक्षक,उत्कष्ट मध्यपंक्ति, उत्कृष्ट प्रशिक्षकलाई क्रमशःनगद ५ हजार पुरस्कार तथा प्रमाणपत्र प्रदान गरिने आयोजक तुलसीपुर उपमहानगरपालिका वडा न ६ का अध्यक्ष तथा प्रतियोगिता मुल आयोजक समितिका संयोजक दुजमान भन्डारीले जानकारी दिनु भएको छ । माघ १९ गतेदेखि संचालित प्रतियोगितामा तुलसीपुर नगरका १९ वडा मध्य १६ वडाका टिमको सहभागिता रहेको थियो ।