वडा नंं ६ लाई अध्यक्ष कपको उपाधि
तुलसीपुर, २६ माघ । तुलसीपुरमा सञ्चालित सर्वाधिक राशीको अध्यक्ष कप अन्तर वडास्तरीय रनिङ फुटबल प्रतियोगिता २०८१ को उपाधि वडा नम्बर ६ ले जितेको छ ।
तुलसीपुर उपमहानगरपालिका वडा नं. ६ को आयोजना तथा युथ अफ तुलसीपुर र मदन भण्डारी स्पोट्र्स क्लबको सहकार्यमा शुक्रवार सम्पन्न फाइनल खेलमा वडा नं. ८ लाई ४–० गोलले पराजित गर्दै वडा नं. ६ ले उपाधि जितेको हो । उल्लेख दर्शकले भरिएको अरनीको मैदानमा भएको खेलमा आफ्नो दब्दबा प्रस्तुत गरेको वडा नं ६ ले उपाधिसँगै नगद दुई लाख ६६ हजार छ सय ६६ र चाँदीको रनिङ शिल्ड हात पा¥यो ।
फाइनलमा हार व्यहोरेको वडा नं ८ उपविजेतामा सीमित रहँदै नगद एक लाख ६६ हजार छ सय ६६ सहित कप, मेडल र प्रमाणपत्रमा चित्त बुझाउन बाध्य भयो । प्रतियोगिता अवधिभर उत्कृष्ट खेल प्रदर्शन गर्ने व्यक्तिगत विधातर्फ बेस्ट प्लेयर वडा नं ६ का हरिहर बुढा मगर भए । उनले नगद आठ हजार तथा ट्रफी हात पारे । यसैगरी बेस्ट डिफेन्स वडा नं. ६ का एलिस रसाइली, हाइ स्कोरर वडा नं. ६ का सागर गन्धर्व, बेस्ट किपर वडा नं. ६कै प्रतीक शेर्पाइली, बेस्ट मिड फिल्डर वडा नं. ८ का राजबहादुर बस्नेत, बेस्ट कोच वडा नं. ६ का कमल लामिछाने भए । उत्कृष्ट सबैलाई जनही पाँच हजार तथा ट्रफी प्रदान गरिएको थियो ।
यसैबिच प्रतियोगिताको समापन समारोह तुलसीपुर उपमहानगरपालिका वडा नं. ६ का अध्यक्ष तथा प्रतियोगिता मूल आयोजक समितिका संयोजक दुज्मान भण्डारीको अध्यक्षता तथा लुम्बिनी प्रदेश सरकारका पूर्व अर्थमन्त्री माननीय धनबहादुर मास्कीको प्रमुख आतिथ्यता एवम् तुलसीपुर उपमहानगरपालिका उपप्रमुख स्यानी चौधरी र वडा नं. १८ का वडाध्यक्ष तथा नगर प्रवक्ता माधव वलीको विशिष्ट आतिथ्यतामा भएको थियो । कार्यक्रमको सहजीकरण नानीमैया वलीले गरेकी थिइन् । माघ १९ गतेदेखि सञ्चालित प्रतियोगितामा तुलसीपुर नगरका १९ वडामध्ये १६ वडाका फुटबल टिमको सहभागिता थियो ।