भरुवा बन्दुकको गोली लागेर बालकको मृत्यु
घोराही, २६ माघ । दाङमा भरुवा बन्दुकको गोली लागेर एक बालकको मृत्यु भएको छ । शनिवार विहान करिव ११ बजेतिर तुलसीपुर उपमहानगरपालिका–३ ठुलासम्वामा बरुवा बन्दुकको गोली लागेर आठ बर्षीय बालक भुवन केसीको मृत्यु भएको जिल्ला प्रहरी कार्यालय दाङले जनाएको छ ।
प्रहरीले भरुवा बन्दुक चलाएर भाईको हत्या गरेको आरोपमा मृतक भुवनका दाजु दश बर्षीय शिशिर केसी र बन्दुक लोड गरि राख्ने ६२ बर्षीय बाजे भुपेन्द्र खत्रीलाई नियन्त्रणमा लिएको जिल्ला प्रहरी कार्यालय दाङका प्रहरी निरीक्षक कविराज रोकायले जानकारी दिनुभएको छ ।
प्रहरी निरीक्षक रोकायका अनुसार घरमा लोड गरि राखेको भरुवा बन्दुक शिशिरले खेलाउने क्रममा पड्किदा भाइलाई गोली लागेको थियो । प्रहरीले घट्नास्थलबाट एक थान भरुवा बन्दुक, ४ वटा गोली, ३२८ थान छर्रा समेत बरामद गरेको घट्नाबारे थप अनुसन्धान भइरहेको जिल्ला प्रहरी कार्यालय दाङले जनाएको छ ।