घोराहीमा अवैध सुन र एक लाख बढी नगदसहित एक जना पक्राउ
दाङ, २७ माघ । दाङमा प्रहरीले अवैध सुन र नगदसहित एक जना पक्राउ परेका छन् । प्रहरीले उपमहानगरपालिका–१५ ट्राफिक चोकबाट घोराही उपमहानगरपालिका–१४ मिलनचोक निवासी २५ वर्षीय रञ्जित रसाइलीलाई अवैध सुन र नगदसहित पक्राउ गरेको हो ।
पक्राउ परेका रसाइलीको साथबाट प्रहरीले ४९७.०४ ग्राम तौल सुनसहित नगद एक लाख ७ हजार ८ सय रुपियाँ बरामद गरेको जिल्ला प्रहरी कार्यालय दाङका प्रवक्ता एवं प्रहरी नायव उपरीक्षक चक्रबहादुर शाहले जानकारी दिनुभएको छ । प्रहरी नायव उपरीक्षक शाहका अनुसार रसाइलीले प्रयोग गरेको लु ४६ प ६१६१ नम्बरको सुजिकी कम्पनीको मोटरसाइकल समेत नियन्त्रणमा लिएको छ ।
अवैध रूपमा सुन कारोबार भइरहेको भन्ने गोप्य सूचनाको आधारमा जिल्ला प्रहरी कार्यालय घोराहीबाट खटिएको प्रहरी टोलीले माघको २५ गते साँझ घोराहीस्थीत ट्राफिक चोकबाट पक्राउ गरेको थियो ।
सादा पोशाकमा खटिएको प्रहरी टोलीले लु ४६ प ६१६१ नम्बरको सुजिकी कम्पनीको मोटरसाइकलमा सवार हिडिरहेको अवस्थामा पक्राउ गरेको र उनीमाथि थप अनुसन्धान भइरहेको प्रहरी नायव उपरीक्षक शाहले जानकारी दिनुभएको छ ।