Ad Area

पाँच लाख राशिकाे लुम्बिनी च्याम्पियनसिप फुटबल शुरु


घोराही, २८ माघ । लुम्बिनी फुटबल एकेडेमीको आयोजनामा जिल्लाकै सबैभन्दा ठूलो पुरस्कार राशीको फुटबल प्रतियोगिता लुम्बिनी च्याम्पियनसिप खुला नकआउट फुटबल प्रतियोगितामा शुरु भएको छ ।

‘स्वस्थ युवा, अनुशासित नेतृत्व, आत्मविश्वास निर्माण, खेल संस्कार र खेलकुदलाई व्यावसायिक रुपान्तरण’ भन्ने नाराका साथ एकेडेमीको खेलमैदान घोराही १७ गैरागाउँमा सोमबारदेखि प्रतियोगिता शुरु भएको हो ।

एकेडेमीका अध्यक्ष समीर वलीको अध्यक्षता तथा लुम्बिनी प्रदेश खेलकुद परिषदका सदस्य सचिव तिरनदाज गौतमको प्रमुख आतिथ्य एवम् राष्ट्रिय फुटबल टोलीका कप्तान किरण चेम्जोङको विशिष्ट आतिथ्यमा सोमबार प्रतियोगितासँगै खेल मैदानको उदघाटन गरिएको हो ।

कार्यक्रममा प्रमुख अतिथि लुम्बिनी प्रदेश खेलकुद परिषदका सदस्य सचिव गौतमले सरकार र नीजि क्षेत्रको सहकार्यबाट खेलकुदको विकास सम्भव रहेको बताउनुभयो । उहाँले दाङमा निजि स्तरबाट गरिएको लगानीबाट फुटबलको विकासमा ठूलो योगदान पुर्याउने काम लुम्बिनी फुटबल एकेडेमीले गरिरहेको भन्दै यसमा सबै क्षेत्रले सहयोग गर्नुपर्ने बताउनुभयो ।

खेल क्षेत्रको समग्र विकासका लागि पूर्वाधारको विकास, प्रशिक्षण र प्रतियोगिता महत्वपूर्ण रहने भन्दै लुम्बिनी फुटबल एकेडेमीले तीन वटै विषयलाई समेटेर अघि बढ्नु निकै सराहनीय पक्ष रहेको बताउनुभयो । यसैगरी, राष्ट्रिय फुटबल टोलीका कप्तान चेम्जोङले फुटबलको विकासका लागि लुम्बिनी फुटबल एकेडेमीले मोफसलमा नयाँ अभ्यासको थालनी गर्नु नेपालमा भोलिका लागि राम्रा खेलाडी उत्दान हुने आधार निर्माण गरेको बताउनुभयो ।

नेपालको फुटबललाई मोफसलका खेलाडीले धान्दै आएको भन्दै उहाँले लुम्बिनी फुटबल एकेडेमीले पनि भोलिका दिनमा राम्रा खेलाडी उत्पादन गर्नेमा आफु आशावादी रहेको बताउनुभयो । उहाँले फुटबलको विकास र खेलाडी उत्पादनका लागि आफुले सक्दो सहयोग गर्ने प्रतिवद्धता पनि जनाउनुभयो ।

एकेडेमीमा बस्दै आएका विभिन्न १४ जिल्ला ३० बढी खेलाडीको प्रशिक्षण र पढाई सहयोगार्थ प्रतियोगिता आयोजना गरिएको आयोजकले जनाएको छ । एकेडेमीले बसेर फुटबल प्रशिक्षण लिईरहेका खेलाडीहरुलाई विदेशी प्रशिक्षकहरुले प्रशिक्षण गराउने काम गर्दै आएका लुम्बिनी फुटबल एकेडेमीले जनाएको छ । प्रतियोगिताको उदघाटन समारोहमा एकेडेमी र प्रतियोगिता बारे एकेडेमीका अध्यक्ष वलीले जानकारी गराउनुभएको थियो भने सहजीकरण रेश्मा बुढाथोकीले गर्नुभएको थियो ।