जनयुद्ध दिवसका नाममा शिक्षक र बालबालिका प्रयोगको घट्नाप्रति अनेरास्ववियु रोल्पाको गम्भीर ध्यानाकर्षण
रोल्पा, ३ फागुन । नेकपा माओवादीले जनयुद्ध दिवस (सशस्त्र संघर्ष) कार्यक्रमको अवसरमा विद्यालयमा अध्ययनरत स–साना बालबालिकालाई प्रयोग गरेको घट्नाप्रति अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) जिल्ला कमिटी रोल्पाले आफ्नो गम्भीर ध्यानाकर्षण भएको जनाएको छ ।
अखिल नेपाल राष्टिय स्वतन्त्र विद्यार्थी युनियन (अनेरास्ववियु) जिल्ला कमिटी रोल्पाका अध्यक्ष सुर्य विकले शुक्रवार एक प्रेस विज्ञप्ति जारी गर्दै फागुनको १ गते परिवर्तन गाउँपालिका वडा नं. २ राङ्सी रोल्पामा रहेको नेकपा माओवादी केन्द्रले जनयुद्ध (सशस्त्र सघर्ष) दिवस मनाउँँदै गर्दा जनसेवा नमूना माध्यामिक विद्यालयमा अध्ययनरत कलिलै उमेरका स–साना विद्यार्थीसहित शिक्षकहरु पोशाकमै पार्टीको झण्डा बोकेर कार्यक्रममा सहभागी भएको घट्नाप्रति गम्भीर ध्यानाकर्षण भएको जनाएका छन् ।
नेपालको संविधान र सर्वोच्च अदालतले समेत अस्विकार गरेको जनयुद्ध दिवस कार्यक्रममा विद्यालयका बालबालिका र शिक्षक विद्यालय पोशाकमै ¥यालीमा सहभागी हुनु समग्र शैक्षिक क्षेत्रकै लज्जाको विषय र अदालतको आदेशको समेत अवज्ञा भएको विज्ञप्तिमा उल्लेख गरिएको छ । साथै विज्ञप्तिमा परिवर्तन गाउँपालिका शिक्षा शाखा, जिल्ला शिक्षा विकास तथा समन्वय इकाइ रोल्पालाई उक्त कार्यक्रममा विद्यालयका शिक्षक र विद्यार्थीहरु किन, कसरी र कसको आदेशमा सहभागी वा प्रयोग गरिएको हो ?, यस बारेमा तत्काल छानविन गरि कार्यक्रममा सहभागी हुने र गराउने जिम्मेवार व्यक्तिलाई कारवाहीको अनेरास्ववियु रोल्पाले जोडदार माग गरेको छ ।
साथै स–साना विद्यार्थीसहित शिक्षकहरु पोशाकमै पार्टीको झण्डा बोकेर कार्यक्रममा सहभागी भएको उक्त घट्नाका बारेमा अनेस्वावियुले जिल्ला शिक्षा विकास तथा समन्वय इकाइ रोल्पालाई अनलाइनमार्फत ध्यानाकर्षणपत्र समेत बुझाउने अध्यक्ष विकले बताएका छन् ।