प्रतिष्ठानको पाँचौँ सभा बैठक, दुई अर्ब ४३ करोड बढी बजेट स्वीकृत
दाङ, ८ फागुन । घोराहीमा रहेको राप्ती स्वास्थ्य विज्ञान प्रतिष्ठानको सभाको बैठक काठमाडौंमा सम्पन्न भएको छ । प्रधानमन्त्री तथा राप्ती स्वास्थ्य विज्ञान प्रतिष्ठानका कुलपति केपी शर्मा ओलीको अध्यक्षतामा मङ्गलवार प्रधानमन्त्रीको कार्यालय बालुवाटारमा बसेको बैठकले प्रतिष्ठानको सेवा विस्तार र पूर्वाधार निर्माणका लागि महत्वपूर्ण निर्णय गरेको छ ।
प्रतिष्ठानको पाँचौँ सभाले आगामी आर्थिक वर्षका लागि दुई अर्ब ४३ करोड २५ लाख रुपैयाँको बजेट अनुमोदन गरेको छ । प्रतिष्ठानको नीति, योजना तथा कार्यक्रम अन्तर्गत आर्थिक वर्ष २०८०÷०८१ को बजेट तथा कार्यक्रम अनुमोदन एवम् आर्थिक वर्ष २०८१÷०८२ को दुई अर्ब ४३ करोड २५ लाख १२ हजार नौ सय ६७ रुपैयाँ ४८ पैसाको बजेट कार्यक्रम स्वीकृत गरेको हो ।
सभाले मुटु रोग, न्युरोलोजी, आँखाको क्यान्सर, मद्यपान तथा लागूपदार्थ दुव्र्यसन र जलन उपचार सेवा विस्तार गर्ने प्रस्ताव पारित गरेको रजिस्ट्रार डा. श्याम लम्सालले जानकारी दिएका छन् । उनका अनुसार अब बिरामीलाई उपचारका लागि काठमाडौं जानुपर्ने बाध्यता अन्त्य हुने भएको छ । प्रतिष्ठानका रजिस्ट्रार डा.लम्सालका अनुसार सभाले प्रतिष्ठानका लागि चार सय श्ययाको अत्याधुनिक अस्पताल निर्माण गर्ने निर्णय गरेको छ ।
बैठकमा बोल्दै प्रधानमन्त्री ओलीले प्रतिष्ठानलाई विशिष्टीकृत उपचार केन्द्रको रूपमा विकास गर्न निर्देशन दिएका थिए । सिकलसेल एनिमियालगायतका रोगको स्थानीयस्तरमै उपचार हुनुपर्ने भन्दै कुलपति समेत रहेका प्रधानमन्त्री ओलीले जनतालाई सहज रूपमा गुणस्तरीय सेवा प्रदान गर्ने गरी लाग्न निर्देशन दिएका थिए । स्वास्थ्य तथा जनसङ्ख्या मन्त्री एवम् प्रतिष्ठानका सहकुलपति प्रदीप पौडेलले स्वास्थ्य बिमा कार्यक्रमलाई प्रभावकारी बनाउन र आर्थिक रूपले विपन्न नागरिकलाई निःशुल्क उपचारको व्यवस्था मिलाउन निर्देशन दिए ।
सभाले आगामी आर्थिक वर्ष ०८२÷०८३ को बजेट तथा कार्यक्रम तयारीका लागि रजिस्ट्रारको अध्यक्षतामा तीन सदस्यीय समिति गठन गरेको छ । सभाले प्रतिष्ठानको सभा सदस्यमा डा सुदीप गौतम, प्रकाश श्रेष्ठ, बलिभद्र राना, सुशीला चौधरी, यमुना थापा मगरलगायत १२ जनालाई मनोनयन गरेको छ ।