ट्रमा सेन्टर निर्माणको ८५ प्रतिशत काम
दाङ, १७फागुन । लुम्बिनी प्रदेशको राजधानी देउखुरी क्षेत्रमा निर्माण हुन थालेको ट्रमा सेन्टर अन्तिम चरणमा पुगेको छ । पूर्व–पश्चिम राजमार्ग अन्तर्गत देउखुरी क्षेत्रमा हुने दुर्घटनाका घाइतेसँगै अन्य बिरामीलाई उपचार गर्ने गरी निर्माण हुन थालेको ट्रमा सेन्टरको करिब ८५ प्रतिशत काम सम्पन्न भएको हो ।
निर्माणमा कुनै समस्या नभए चालु आर्थिक वर्षभित्रै निर्माण सकेर लुम्बिनी प्रदेश सरकारलाई हस्तान्तरण गर्ने गरी ट्रमा सेन्टर निर्माणको काम भइरहेको छ । चालु आर्थिक वर्षमा ट्रमा सेन्टर निर्माणको काम सक्ने गरी काम भइरहेको सहरी विकास तथा भवन कार्यालयका निमित्त प्रमुख ईश्वरीप्रसाद देवकोटाले बताएका छन् ।
करिब २२ कट्ठा क्षेत्रफलमा निर्माण हुन थालेको ट्रमा सेन्टरको काम जतिसक्यो चाँडै सक्ने गरी लागेको भन्दै कार्यालय प्रमुख देवकोटाले भने, ‘ट्रमा सेन्टर निर्माणको म्याद चैतसम्म छ तर यो अवधिमा सकिने अवस्था छैन । यसैले केही समय थपेर चालु आर्थिक वर्षभित्रै काम सक्ने गरी लागेका छौँ ।’
पछिल्लो समय ट्रमा सेन्टरको भवन निर्माणको कामले गति लिएको र मुख्य भवनको काम करिब अन्तिम चरणमा पुगेकाले बाँकी काममा समस्या नहुने कार्यालय प्रमुख देवकोटाले बताएका छन् । कार्यालयका निमित्त प्रमुख देवकोटाका अनुसार मुख्य भवनको फिनिसिङसँगै अहिले क्यान्टिन, डाक्टर, नर्स र कर्मचारी क्वाटरसँगै शौचालय निर्माणको काम भइरहेको छ । विभिन्न कारणले सुरुको समयमा भवन निर्माणको काम ढिलाइ हुँदा सम्झौता मितिमा ४० प्रतिशत मात्रै काम गरेको निर्माण कम्पनीले पछिल्लो समय राम्रो काम भइरहेको बताए । पछिल्लो समय भइरहेको कामले चालु आर्थिक वर्षभित्रै ट्रमा सेन्टरको भवन निर्माणको काम सकिने कार्यालय प्रमुख देवकोटाले बताए ।
लुम्बिनी प्रदेश सरकारको गौरवको आयोजनाका रूपमा रहेको ट्रमा सेन्टर २०८० असार २३ गतेभित्र निर्माण सक्र्ने गरी २०७७ फागुन २८ गते लामा एन्ड गौरीशंकर हिमालयन कन्स्ट्रक्सन प्रालि काठमाडौंसँग ठेक्का सम्झौता भएको थियो । ५० श्ययाको ट्रमा सेन्टर निर्माणका क्रममा कुनै समस्या नदेखिए चालु आर्थिक वर्षभित्र निर्माणको काम सक्ने गरी काम भइरहेको निर्माण कम्पनीका प्रतिनिधि आइतसिंह तामाङ बताउँछन् ।
निर्माणका क्रममा बजेट अभावको समस्या देखिने गरेको भन्दै उनले बजेटको समस्या नभए ४÷५ महिनामा सबै काम सकेर भवन हस्तान्तरण गर्ने बताउँछन् । उनका अनुसार ट्रमा सेन्टरको मुख्य ठुलो भवनको फिनिसिङ, रँगरोगन र झ्याल, ढोका जोड्नेलगायतका काम भइरहेकाले अब ठुलो काम नभएको बताउँछन् । ‘ट्रमा सेन्टरको मुख्य काम भनेको सकिएको छ, अब गर्ने ठुलो काम छैन’, निर्माण कम्पनीका प्रतिनिधि तामाङले भने, ‘बजेटको समस्या नभए अबको ४÷५ महिनामा काम सकिन्छ ।’
ट्रमा सेन्टरको भवन निर्माणका लागि भ्याटबाहेक १९ करोड ४१ लाख चार हजार १४ रुपैयाँमा २०७७ साल चैत २४ गते ठेक्का सम्झौता भएको थियो । ट्रमा सेन्टर निर्माणको काम २०७८ वैशाख १ गतेदेखि सुरु भए पनि निर्माण स्थलमा रुख हटाउन ढिलाइ हुँदा लामो समय काम सुरु हुन सकेको थिएन । रुख कटान भएपछि निर्माणको कामले गति लिएको छ । ट्रमा सेन्टर निर्माण भएपछि देउखुरी क्षेत्रमा उपचारमा सहज हुने अपेक्षा गरिएको छ ।