९७ मुद्दामा ११० जना पक्राउ, लागूऔषधका धेरै
दाङ, १ चैत । जिल्ला प्रहरी कार्यालय दाङका अनुसार पछिल्लो एक महिनाको अवधिमा विभिन्न ९७ वटा मुद्दा दर्ता भएका छन् । जिल्ला प्रहरी कार्यालय दाङसँगै मातहत अन्तर्गतका विभिन्न कार्यालयमा फागुन महिनामा दर्ता भएका ९७ मुद्दामा एक सय १० जना आरोपी पक्राउ परेका छन् ।
जिल्ला प्रहरी कार्यालय दाङले आयोजना गरेको पत्रकार सम्मेलनमा प्रवक्ता एवम् प्रहरी नायव उपरीक्षक चक्रबहादुर शाहका अनुसार आरोपीमध्ये अझै नौ जना फरार छन् । प्रहरी नायव उपरीक्षक शाहका अनुसार दर्ता भएकामध्ये २४ वटा मुद्दा फस्र्योट भएको बताए । उनका अनुसार जिल्लामा सबैभन्दा धेरै लागूऔषधसम्बन्धी १९ मुद्दा दर्ता छन् । जसमा ३२ जना संलग्न पक्राउ परेको प्रहरी नायव उपरीक्षक शाहले बताए ।
यसैगरी अभद्र व्यवहारसम्बन्धी १२ वटा, चोरी ११ वटा, बैङ्किन कारोबारसम्बन्धी नौ वटा, आत्महत्या झुन्डिएर र भवितव्य ज्यानसम्बन्धी सात÷सात वटा, सवारी ज्यान र फुटकर ज्यानसम्बन्धी छ÷छ वटा, जबर्जस्तीकरणीसम्बन्धी पाँच वटा, ज्यानसम्बन्धी कसुर, ठगी, विष सेवन गरी आत्महत्या, बालयौन दुरुपयोगसम्बन्धी दुई÷दुई वटा, हातहतियार खरखजना, सवारी अङ्गभङ्ग, डाका–चोरी र सार्वजनिक शान्ति सुरक्षाविरुद्धको कसुरसम्बन्धी एउटा मुद्दा दर्ता भएका छन् ।
प्रहरीले विशेष गरी लागूऔषध कारोबार, अपराध नियन्त्रणलगायत शान्ति सुरक्षाका लागि विभिन्न सचेतनामूलक कार्यसमेत गर्र्दै आएको बताएका थिए । प्रहरीले जिल्लामा एक महिनाको अवधिमा एक सय २९ जना फरार प्रतिवनदी पक्राउ गरेको छ ।
अदालतबाट विभिन्न समयमा दोषी ठहर भई फरार रहेका २० वर्षपछि तीनजना, १५ वर्षपछि चारजना, १० वर्षपछि १८ जना, पाँच वर्षपछि १५ जना र पाँच वर्षभन्दा कमका नौ जना गरी एक सय २९ जना फरार प्रतिवादी पक्राउ गरिएको जिल्ला प्रहरी कार्यालय दाङका प्रहरी नायव उपरीक्षक शाहले जानकारी दिए । उनका अनुसार पक्राउ परेका प्रतिवादीबाट नगद दुई लाख तीन हजार चार रुपैयाँ ७९ पैसा असुलउपरसहित एक सय ३४ वर्ष सात महिना पाँच दिन कैद सजाय भुक्तानका लागि कारागार चलान गरिएको छ ।