दाङ महिला जेसीजद्वारा हाेली मिलन कार्यक्रम सम्पन्न
घोराही, १ चैत । दाङ महिला जेसीजको आयोजनामा होली मिलन कार्यक्रम घोराहीमा भव्य रूपमा सम्पन्न भएको छ। नेपाली समाजमा रंगहरूको पर्वका रूपमा मनाइने होलीलाई सद्भाव, आपसी सम्बन्ध र महिला सशक्तिकरणको अवसरका रूपमा उपयोग गर्दै दाङ महिला जेसीजले विशेष कार्यक्रमको आयोजना गरेको हो।
दाङ महिला जेसीज वर्ष २०२५ की अध्यक्ष अनिता ढकालको अध्यक्षता तथा घोराही उपमहानगरपालिकाकी उपप्रमुख हुमा डिसीको प्रमुख आतिथ्यमा शुक्रबार होली विशेष कार्यक्रम गरेको हो ।
अन्याय, विभेद र बेथिति विरुद्ध महिला आवाज सशक्त बनाउँदै न्याय, समानता र सशक्तीकरणमा जुट्न यस प्रकारका पर्वले सद्भाव जगाउन भुमिका खेल्ने प्रमुख अतिथि डिसीले बताउनुभयो ।
कार्यक्रममा विभिन्न विशिष्ट व्यक्तिहरूले पनि मन्तव्य व्यक्त गर्नुभएको थियो । महिला मानव अधिकार रक्षक दाङकी अध्यक्ष अनिता पोख्रेल, गाेरक्ष दैनिकका प्रकाशक सुलाेचना गाैतम, दाङ महिला जेसीजका निवर्तमान अध्यक्ष जुनकुमारी बुढा, पूर्व अध्यक्षहरु सुशीला पौडेल, डोमा पाण्डेय, ममता बिष्ट, संस्थापक कार्यकारिणी उपाध्यक्ष कल्पना बिष्टलगायत सहभागी सबैले आ-आफ्नो धारणा राख्नुभएको थियो। महिला नेतृत्व, समाजसेवा र समुदायमा सकारात्मक परिवर्तनका लागि निरन्तर क्रियाशील रहनुपर्ने विषयमा उनीहरुकोे जोड थियो।
दाङ महिला जेसीज सहसचिव तुलसी चपाईंको स्वागत मन्तव्यबाट भएको कार्यक्रममा उपाध्यक्ष दीपा पुनले आस्था पाठ प्रस्तुत गर्नुभएको थियो। कार्यक्रमको सहजीकरण महासचिव भीमा डिसीले गर्नुभएको थियो।