पिएम कपमा आज नेपाल पुलिस क्लब र मधेश प्रदेश भिड्दै
घोराही, २ चैत । दाङमा जारी नेपाल टेलिकम प्रधानमन्त्री कप एकदिवसीय पुरुष क्रिकेट प्रतियोगिता २०८१ अन्तरगत आज विभागीय टीम नेपाल पुलिस क्लब र मधेश प्रदेश टीम भिड्दैछन् ।
लमहीस्थित देउखुरी अन्तर्राष्ट्रिय क्रिकेट रंगशालामा नेपाल पुलिस क्लब र मधेश प्रदेश टीम बीच बिहान ९ बजेपछि खेल शुरु हुनेछ । दाङमा पहिलो पटक आयोजना गरिएको पिएम पुरुष क्रिकेट प्रतियोगितामा पुलिस क्लब अपराजित टीम हो भने मधेश प्रदेश प्रतियोगितामा प्रभावशाली खेल प्रस्तुत गर्दै आएको टीम भएकाले आजको खेल निकै प्रतिष्पर्धात्मक तथा रोमाञ्चक हुने अनुमान गरिएको छ ।
आजको खेलमा नेपालको राष्ट्रिय टोलीका अधिकांश सदस्य सम्मिलित दुई टीमबाट मैदानमा उत्रिने हुँदा प्रतिष्पर्धा भव्य हुने देखिएको छ । नेपाल पुलिस क्लबको कप्तानी कप्तान दिपेन्द्र सिंह ऐरीले र मधेश प्रदेश टीमको कप्तानी अनिलकुमार साहले सम्हालेका छन् ।
प्रतियोगिताको १७ औँ खेल अन्तरगत देउखुरी अन्तर्राष्ट्रिय क्रिकेट रंगशालामा दुई टीम जीतको खोजीमा हुनेछन् । पुलिस क्लब लगातार ३ खेलमा जीत निकाल्दै अंक तालिकाको दोस्रो स्थानमा छ भने आजको खेल जित्दै शीर्ष स्थानमा उक्लिन चाहन्छ । मधेश प्रदेशको टीम पनि बलियो मानिएको पुलिस क्लबलाई हराउँदै अंक तालिकामा सुधार गर्दै माथि उक्लिन चाहन्छ । मधेश प्रदेश अंकको तालिकाको पाँचौँ स्थानमा छ ।
विभागीय टीम पुलिस क्लबले हिजो मात्रै डर्बी एपीएफलाई २ विकेटले हराएको थियो भने यसअघि कोशी प्रदेशलाई १५४ रन र लुम्बिनी प्रदेशलाई ८७ रनले हराउँदै पिएम कपको दावेदारी देखाईरहेको छ । यसैगरी, मधेश प्रदेशको टीमले खेलेको दुई खेलमा एकमा जीत र एकमा हार व्यहोरेको छ । जसमा कोशी प्रदेशलाई १६५ रनले हराएको थियो भने एपीएफसँग २ विकेटले पराजित भएको थियो । प्रतियोगिताको तेस्रो खेल खेलीरहेको मधेशले आजको खेलमा एपीएफसँगको खेलमा गरेको कमजोरी सुधार गर्दै खेल्ने रणनीति बनाएको छ । पुलिस क्लब भने लगातारको जीतलाई निरन्तरता दिने रणनीतिका साथ मैदानमा उत्रिँदैछ ।
खेललाई मध्य नजर गर्दै लमहीमा भईरहेको पिएम कपको व्यवस्थापन हेरिरहेकोे दाङ जिल्ला क्रिकेट संघले दर्शकहरुक लागि भिआईपी टिकट बाहेक अरु टिकट निशुल्क गरेको छ । हिजोदेखि दर्शकहरुलाई खेल मैदानमा उपस्थित भई हेर्न पूर्व गेट र पश्चिम गेटबाट प्रवेश निशुल्क गरिएको छ ।
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगिता अन्तरगत आज हुने एपीएफ क्लब र नेपाल पुलिस क्लब बिचको खेलका लागि भिआईपी टिकट शुल्क २ सय रुपैयाँ रहेको र अरु टिकटको हकमा निशुल्क प्रवेश गरिएको दाङ जिल्ला क्रिकेट संघका अध्यक्ष तथा क्यान केन्द्रीय सदस्य प्रदीप मजगैँयाले जानकारी दिए ।
३ विभागीय टीम आर्मी क्लब एपीएफ क्लब र नेपाल पुलिस क्लबसहित सात प्रदेश टीमले फागुन २५ गतेबाट लुम्बिनी प्रदेशको रुपन्देही र दाङमा प्रतियोगिता खेलीरहेका छन् । दाङसहितमा रुपन्देहीको सिद्धार्थ क्रिकेट रंगशाला र एक्स्ट्राटेक ओभल मैदानमा एकैसाथ शुरु भएको प्रतियोगिताका खेलहरु राउण्ड रोविनका आधारमा भईरहेका छन् । हरेक टीमले एक अर्को टीमसँग खेल्नेछन् । आगामी चैत १६ गतेसम्म चल्ने प्रतियोगिता अन्तरगत दाङमा १४ वटा खेल हुने तालिका रहेको छ ।