सिमलकुनाबासीलाई अस्थायी पुलको सहारा
हापुरे, ३ चैत । पश्चिम दाङको सिमलकुना गाउँ, विकास निर्माणको अभावमा आधारभूत सुविधाबाट वञ्चित छ । भौगोलिक विकटताका कारण सडक, सञ्चार, विद्युत, स्वास्थ्य र खानेपानी जस्ता आधारभूत आवश्यक पूर्वाधारबाट सिमलकुनावासी वञ्चित छन् । बबई गाउँपालिका–१ अन्तर्गत पर्ने सिमलकुनाबासी वर्षभरि यातायात आवागमन गर्ने बाटो नभएको गुनासो गरेका छन् ।
गाउँमा दुःख, बिरामी पर्दा हापुरे बजारसम्म पुग्न सबैभन्दा पहिले सडक बन्नुपर्ने सिमलकुना निवासी ५१ वर्षीय खिमबहादुर वली बताउँछन् । भरपर्दाे सडकसँगै बबई नदीमा पुल नहुँदा हिउँदमा यातायातका साधन चल्ने भए पनि अन्य समयमा नचल्दा पैदल हिड्नु पर्ने बाध्याता रहेको उनले बताए । उनका अनुसार असारदेखि कात्तिक, मङ्सिरसम्म गाडी नचल्ने समस्या रहेको छ ।
बबई नदीमा पानी कम भएपछि हिउँदमा ह्युमपाइप राखेर अस्थायी पुल निर्माण गरेर ट्याक्टर, ट्याक्सी, अटोलगायत मोटरसाइकल चल्ने गरेका छन् । भौगोलिक विकटतासँगै नेताहरूको बेवास्ताका कारण सडक र बबईमा पुल नबन्दा स्थानीयले दुःख पाउने अवस्था रहेको भन्दै वलीले भने, ‘गाउँमा विकासका पूर्वाधार पुगेकै छैन । सडकको अवस्था कमजोर छ, विद्युत र सञ्चारको सुविधा पनि छैन ।’
सडक राम्रो नहुँदा दुःख–बिरामी पर्दा उपचारका लागि हापुरे वा तुलसीपुरसम्म जान र दैनिक उपभोग्य सामग्री तथा खाद्यान्न ल्याउन समस्या हुने गरेको वलीले बताउँछन् । सडक विस्तारसँगै ग्राभेल गरिदिए मात्र आफूहरूका लागि धेरै सहज हुने उनले बताए । करिब ७० घरपरिवार बसोबास गर्ने सिमलकुना र मलईका नागरिकलाई विकासका पूर्वाधारसँग जोड्न बबई नदीमा पक्की पुल, विद्युत, सञ्चार, स्वास्थ्यलगायतका पूर्वाधारले जोड्नुपर्ने अर्का ५४ वर्षीय स्थानीय चन्द्रबहादुर राँङु मगर बताउँछन् । अहिले पनि घरमा फोनले काम नगर्दा फोन गर्नकै लागि अग्लो ठाउँ खोज्नुपर्ने र उज्यालोको लागि सोलार, मट्टीतेलको भर पर्नुपर्ने स्थानीयको बाध्यता रहेको उनको भनाइ छ ।
आर्थिक रूपमा सम्पन्न परिवारले सोलार जडान गरे पनि गरिबीका कारण कतिपय परिवारले अहिले पनि मट्टीतेलले टुकी बाल्ने गरेको बबई गाउँपालिका–१ का वडा सदस्य समेत रहेका राँङु मगरले भने, ‘गाउँमा विद्युतको सुविधा छैन । आर्थिक रूपमा सम्पन्न परिवारले सोलार राख्नुभएको छ । त्यहीबाट साँझमा बत्ती बाल्ने र मोबाइल चार्ज गर्दै आउनुभएको छ ।’ आजभोलि स्थायी पुल निर्माण गरेर साना गाडी चले पनि पुस, माघ महिनातिर घाम नलाग्दा बत्ती बाल्न समस्या हुने गरेको बताउँछन् ।
बबई गाउँपालिका अध्यक्ष कुलबहादुर खत्रीले भौगोलिक विकटताका कारण विकासका पूर्वाधार पु¥याउन समस्या भए पनि पछिल्लो समय विस्तारै सिमलकुनालाई विकासका पूर्वाधारले जोड्ने काम भइरहेको बताएका छन् । सडकसँगै सञ्चार सुविधा पु¥याउन मलईमा टेलिकमले टावर निर्माण भइरहेको बताए ।
उक्त टावर निर्माण भएपछि स्थानीयले वर्षाैँदेखि भोग्दै आएको सञ्चारको समस्याबाट मुक्त हुने भन्दै गाउँपालिका अध्यक्ष खत्रीले भने, ‘सञ्चारको सुविधा पु¥याउन टावर निर्माण भइरहेको छ । यो टावर निर्माण भएपछि सिमलकुना र मलई दुवै ठाउँमा सञ्चार पुग्नेछ ।’ मलई र सिमलकुनालाई विकाससँग जोड्न सडक, सञ्चारसँगै स्वास्थ्य, शिक्षालगायतका पूर्वाधारसँग जोड्ने प्रयास भए पनि पालिकाको सीमित बजेटले एकै वर्षमा सम्भव नभएको बताउँदै अध्यक्ष केसीले प्रदेश सरकार तथा सङ्घीय सरकारको सहयोग आवश्यक रहेको बताए ।