ट्याक्टर घरभित्र छिर्दा, खाना खाइरहेका पाँच जना घाइते
दाङ, ३ चैत । तुलसीपुरमा ट्याक्टर अचानक घरभित्र छिर्दा पाँच जना घाइते भएका छन् । बिजौरीबाट मानुपरतर्फ जाँदै गरेको लुम्बिनी प्रदेश ००२–००१ त ००८५ नम्बरको ट्याक्टर शनिबार बेलुका करिव साढे ७ बजेको समयमा मानपुर नजिकै अनियन्त्रित भएर भएरभित्र ठोक्किन जाँदा खाना खाइरहेका पाँच जना घाइते भएको प्रहरीले जानकारी दिएको छ ।
इलाका प्रहरी कार्यालयका अनुसार ट्याक्टरको ठक्करबाट तुलसीपुर उपमहानगरपालिका–१७ मानपुर निवासी ५६ बर्षीय रामकृष्ण चौधरी, उहाँका छोरीहरु २० बर्षीया प्रिमा चौधरी र २८ वर्षीया शान्ता चौधरी, सोही ठाउँका ४२ बर्षीय भक्तबहादुर खत्री र २८ बर्षीय रामजी गुप्ता घाइेत भएका छन् ।
दुर्घटना लगत्तै चालक र सहचालक फरार रहेको र ट्याक्टर मालिक भने सम्पर्कमा आएको प्रहरीले जनाएको छ । ट्याक्टरको ठक्करबाट घरसमेत भत्किएको छ । घाइते सबैलाई राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि नेपालगञ्ज पठाइएको प्रहरीले जनाएको छ ।