पर्यटकीय गन्तव्य बनेको पुरन्धारा झरना
दाङ, १० चैत । बबई गाउँपालिका–५ मा रहेको पुरन्धारा झरना पछिल्लो समय पर्यटकीय केन्द्रका रूपमा विकास भएको छ । हापुरे बजारबाट करिब १० किलोमिटर पश्चिम–दक्षिण बबई नदीको छेउमा रहेको झरनाले आन्तरिक तथा बाह्य पर्यटकलाई लोभ्याउने गरेको छ ।
घना जङ्गलको बिचमा करिब ४५ फिट उचाइबाट झर्ने झरनाकोे मनमोहक दृश्य अवलोकनसँगै फोटो, भिडियो खिच्ने र मनोरञ्जनका लागि मानिसहरू दैनिक त्यहाँ पुग्ने गरेको स्थानीय बताउँछन् । गर्मी मौसममा झरनाको अवलोकनसँगै पौडी खेल्नका लागि धेरै मानिस आउने गरेको बबई गाउँपालिका–५ निवासी स्थानीय शेरबहादुर बस्नेत बताउँछन् । उनका अनुसार झरना अवलोकन, मनोरञ्जन तथा वनभोजका लागि दैनिक सय बढी आन्तरिक तथा बाह्य पर्यटक आउने गरेका छन् ।
झरनाको प्रचारप्रसारसँगै विकासका लागि पूर्वाधार निर्माण भएपछि यो क्षेत्रमा आउने मानिसको सङ्ख्यामा वृद्धि भएको भन्दै बस्नेतले भने, ‘पहिले खासै चर्चामा थिएन, मानिस पनि आउँदैनथिए तर पछिल्लो समयमा झरना क्षेत्रमा पूर्वाधार विकाससँगै प्रचारप्रसार भएपछि आउने मानिसको सङ्ख्या दोब्बरले वृद्धि भएको छ ।’ उनका अनुसार खास गरी सार्वजनिक बिदा र चाडपर्वको समयमा झरना हेर्न आउनेको सङ्ख्या धेरै हुन्छ ।
जङ्गल क्षेत्रमा भएको र स्तरीय सडक नहुँदा बर्सात्को समयमा झरना स्थलसम्म पुग्न समस्या हुने भएकाले सबैभन्दा पहिले सडकको अवस्था सुधारमा ध्यान दिनुपर्ने अर्की स्थानीय सुनिता बुढा बताउँछिन् । सडकको अवस्था सुधार गर्दै उक्त क्षेत्रमा पर्यटक आकर्षणका लागि थप पूर्वाधार निर्माण गर्नसके बाह्य तथा अन्तरिक पर्यटनको वृद्धि हुने उनी बताउँछिन् ।
झरनासँगै जोडेर पर्यटक प्रवर्धनका लागि बबई नदीमा जलविहार, साहसिक खेल, प्राकृतिक पदयात्रा र जङ्गली जीवजन्तु अवलोकनका लागि राम्रो झरना रहेकाले त्यही अनुसार पूर्वाधारको विकास हुन आवश्यक रहेको बताइन् । ‘अहिले मानिसहरू पुरन्धारा झरना मात्र हेर्न आउने गरेका छन्, यहाँ झरना मात्र होइन बबई नदीमा जलविहार, प्राकृतिक पदयात्रा र जङ्गली जीवजन्तु सकिने अवस्था छ’, उनले भनिन्, ‘यी सबैलाई समेटेर विकास गर्न आवश्यक छ । जसले घुम्नेसँगै बबईको आर्थिक समृद्धिमा सहयोग पुग्ने देखिन्छ ।’
झरना भएको क्षेत्रलाई व्यवस्थित रूपमा विकाससँगै प्रचारप्रसारका लागि गुरुयोजना निर्माण गरेर विकासको काम सुरु भए पनि बजेट अभावका कारण पूरा गर्न नसकिएको बबई गाउँपालिका अध्यक्ष कुलबहादुर खत्री बताउँछन् । झरना भएको स्थानसम्म पुग्नका लागि प्रदेश सरकार तथा बबई गाउँपालिकाको सहयोगमा विभिन्न समयमा सडक निर्माण, पिक्निक स्पोट्र्स निर्माण, हिड्ने बाटोमा काठको रेलिङ, भ¥याङ्, शौचालयलगायत निर्माण गरिएको बताए ।
गुरुयोजना अनुसार उक्त क्षेत्रमा पिक्निक स्पोट्र्सलाई व्यवस्थित गर्ने, मन्दिर निर्माण, खानेपानी, विद्युतको व्यवस्था गर्नेलगायतका काम गर्न बाँकी रहेको भन्दै गाउँपालिका अध्यक्ष खत्रीले भने, ‘पुरन्धारा झरना क्षेत्रमा थप पूर्वाधार विकासका लागि धेरै काम गर्न बाँकी छ तर आर्थिक अभावका कारण काम गर्न सकेका छैनौँ ।’