स्वास्थ्य केन्द्रको भवन निर्माण ठप्प
घोराही, १९ चैत । बजेट अभावका कारण घोराही उपमहानगरपालिका–८ स्थित मर्पाडाँडा सहरी स्वास्थ्य केन्द्रको भवन निर्माणको काम रोकिएको छ । दुई बर्षअघि निर्माण सुरु भएको सहरी स्वास्थ्य केन्द्रको भवन गतबर्षदेखि ठप्प रहेको छ ।
आर्थिक वर्ष २०७९÷०८० मा लुम्बिनी प्रदेश सरकारको बजेटमा स्वास्थ्य केन्द्रको भवन निर्माणको काम सुरु भएपनि त्यसपछि बजेटले निरन्तरता नपाउँदा भवन निर्माणको काम रोकिएको सहरी स्वास्थ्य केन्द्रका प्रमुख लालबहादुर डिसीले बताउनुभएको छ । प्रदेश सरकारको अनुदान कार्यक्रमअन्तर्गत परेको १५ लाख बजेटबाट भवन निर्माणको काम सुरु भएको सहरी स्वास्थ्य केन्द्रका प्रमुख डिसी बताउँनुहुन्छ ।
उहाँका अनुसार १५ लाख बजेटबाट चारकोठे भवनको फाउन्डेसनसँगै पिलर उठाउने मात्र काम गरिएको छ । अहिले भएको भवन सनो र साँघुरो भएका कारण ठुलो र सुविधा सम्पन्न बनाउन खोजेपछि बजेट अभावका कारण अघि बढ्न नसकेको प्रमुख डिसी बताउँनुहुन्छ ।
सहरी स्वास्थ्य केन्द्रको भवन निर्माण सुरु भएपनि योजना बहुवर्षीय कार्यक्रममा स्वीकृत नहुँदा बजेटको समस्या भएको लुम्बिनी प्रदेश स्वास्थ्य मन्त्रालयका बरिष्ठ स्वास्थ्य शिक्षा अधिकृत शैलेन्द्रकुमार पाण्डेले बताउनुभयो । ठुला योजनाका काम गर्दा बहुबर्षीय कार्यक्रमअन्तर्गत ठेक्का स्वीकृत हुनुपर्ने भएपनि त्यस अनुसारको प्रक्रिया पुरा नभएका कारण बजेट बिनियोजनमा समस्या भएको बताउनुभयो ।
स्वास्थ्य मन्त्रालयका अधिकृत पाण्डेले भन्नुभयो,‘सहरी स्वास्थ्य केन्द्रको भवन निर्माणको काम बहुबर्षीय कार्यक्रमबाट स्वीकृत भएर काम भएको भए बजेटमा कुनै समस्या हुने थिएन । पहिले नेताको पहुँचमा काम अघि बढिसक्यो अहिले बजेट नहुँदा समस्या भएको छ ।’ उक्त योजनालाई प्रक्रियामा ल्याउने काम भइरहेको मन्त्रालयले जनाएको छ ।
योजना निर्माणका लागि करिव ७०÷८० लाख रुपियाँ लाग्ने अनुमान गरिएको छ । उपभोक्ता समितिमार्फत निर्माण सुरु गरिएको भवन निर्माणका लागि बजेट नहुँदा योजना अलपत्र परेको स्थानीय कुलप्रसाद रजौरे बताउँनुहुन्छ । भवन निर्माणको काम अलपत्र पर्दा पानी परेको समयमा उक्त ठाउँमा पानी जम्मा हुने हुँदा जोखिम बढाएको समेत बताउनुभयो ।