टरिगाउँबाट पुनः हवाई सेवा
दाङ, १९ चैत । दाङको टरिगाउँ विमानस्थलबाट पुनः हवाई सेवा सुरु भएको छ । नेपाल एयरलाइन्सको बिमानको इन्जिनमा समस्या आएपछि पुस महिनादेखि रोकिएको हवाई सेवा सोमवारदेखि सुचारु भएको हो ।
हवाई सेवा सुरु भएसँगै नेपाल एयरलाइन्सको बिमान सोमबार विहान काठमाडौंबाट ११ जना यात्रु लिएर बिमान टरिगाउँ विमानस्थलमा ११ बजेर २९ मिनेटमा अवतरण गरेको थियो । ११ बजेर ४१ मिनेटमा उडेको बिमानले दुई जना यात्रु लगेर गएको नेपाल एयरलाइन्सका स्टेसन इञ्चार्ज बलबहादुर सुनारले जानकारी दिएका छन । इन्चाज सुनारका अनुसार विमान अव विहिवार आउने भएको छ । विमानमा नयाँ इन्जिन राखेर ल्याएपछि सेवा दिन थालिएको उनको भनाइ छ । चैत महिनाभरी हप्तामा २ दिन विमान आउने भएको छ ।
वैशाखदेखि यात्रुको संख्याअनुसार साताको चार दिनसम्म विमान आउने इन्चार्ज सुनार बताउँछन् । ‘हामी यात्रुको खोजिमा रहेका छौं । यात्रुहरूको संख्या बढेमा विमान आउने दिन पनि बढने छ’, इन्चार्ज सुनारले भने,‘यात्रुको संख्या बढ्न सकिने भने अहिलेकै अवस्थामा चल्ने छ ।’ विसं २०११ देखि सञ्चालनमा रहेको टरिगाउँ विमानस्थल चल्ने बन्द हुने क्रम चल्दै आएको छ । वायु सेवा निगमको जहाज गत पुस २ गते अन्तिम पटक टरिगाउँ विमानस्थलमा अवतरण गरेको सुनारले बताए ।
नियमित रुपमा उडान नहुदा जिल्लाबासीले हवाइ सेवाका लागि नेपालगन्ज वा भैरहवा जानुपर्ने बाध्यता छ । विमानस्थलमा २०११ देखि २०४२ सालसम्म नियमित उडान हुँदै आएको थियो । २०५६ देखि २०५८ सालसम्म सेवा अवरुद्ध भएको हो । विमानस्थलको स्तरोन्नतिको माग लामो समयदेखि हुँदै आएको छ । तर यसले सार्थकता पाउन सकेको छैन ।