प्रथम उपमेयर महिला फुटबलको उपाधि वडा नं. १५ लाई
घोराही, १९ चैत । घोराही उपमहानगरपालिका प्रथम उपमेयर कप महिला फुटबल प्रतियोगिताको उपाधि वडा नम्बर १५ ले जितेको छ ।
घोराही उपमहानगरपालिका–१८ नवलपुर फुटबल मैदानमा मंगलवार भएको प्रतियोगिताको फाइनल खेलमा वडा नंं १५ ले वडा नं. १३ लाई २–० गोलले हराउँदै उपाधि जितेको हो । खेलमा वडा नं. १५ लाई उपाधि दिलाउन सन्ध्या कुमालले एक्लै दुई गोल गरेकी थिइन । उनले पहिलो हाफमा गरेको दुई गोल नै निर्णायक बन्न पुगेको थियो ।
पहिलो हाफको ८ मिनेटमा डि–बक्समा पाएको बल विपक्षी गोल किपरलाई छक्याउँदै हेडमार्फत गोल गरेकी थिइन । त्यसैगरी खेलको २८ औँ मिनेटमा सन्जिला कुमालको असिस्टमा सन्ध्याले दोश्रो गोल गर्दै उपाधि दिलाएकी हुन । प्रतियोगितामा विजेता बनेको टिम वडा नं. १५ ले नगद २० हजारसहित शिल्ड, मेडल र प्रमाणपत्र र उपविजेता बनेको वडा नं. १३ ले नगद १० हजारसहित शिल्ड, मेडल र प्रमाणपत्र प्राप्त गरेको छ ।
घोराही उपमहानगरपालिका ८ वटा टिमको सहभागीता रहेको प्रतियोगितामा वडा नं. ३, १०, १३, १५, १६ र १७ को सहभागीता रहँदा वडा नम्बर १० र १७ बाट दुई टिम सहभागी थिए । प्रतियोगिताको उत्कृष्ट खेलाडी वडा नं. १३ कि जुनु पुन भइन । यसैगरी सर्वाधिक गोलकर्ता वडा नं. १५ कि सन्ध्या कुमाल, उत्कृष्ट गोलरक्षक वडा नं. १५ कि सोनम कुमाल, उत्कृष्ट डिफेन्डर वडा नं. १३ की सुस्मिता पुन मगर, उत्कष्ट मिडफिल्ड वडा नं. १३ की यशोदा नेपाली, उत्कृष्ट फरवार्ड वडा नं. १५ कि सन्जिला कुमाल भइन ।
त्यसैगरी उत्कृष्ट टिम कोच वडा नं. १५ का सुशील बानियाँ र अनुसाशित टिम वडा नंं १७ बनेको थियो । खेलकुदको विकाससँगै महिला खेलाडी उत्पादन गर्न पालिकाले वार्षिक तालिका बनाएर खेलकुदका गतिविधि संचालन गर्दै आएको छ । यो पटकबाट महिला फुटबल आयोजना गरेर महिला खेलाडीहरुको आत्मविश्वास जगाउन र खेलप्रति आकर्षण बढाउन प्रतियोगिता आयोजना गरिएको घोराही उपमहानगरपालिका सामाजिक विकास समिति संयोजक एवम् नगर प्रवक्ता राममणि पाण्डेले बताए ।
महिला फुटबलले खेल प्रतिको अवधारण बुझ्न र महिला खेलाडी उत्पादनमा भूमिका खेलेको नगर खेलकुद विकास समितिका अध्यक्ष नरेन्द्र पुनले बताएका छन् ।