घोराहीमा पहिलो पटक क्यारमबोर्ड प्रतियोगिता हुँदै, प्रथम हुने टिमले ३० हजार जित्ने
दाङ,२२ चैत। दाङको घोराहीमा पहिलो पटक क्यारमबोर्ड प्रतियोगिता हुन थालेको छ । खेलकुद क्षेत्रको विकास र नयाँ खेलाडी उत्पादन गर्ने उद्देश्यले प्रथम दाङ जिल्लास्तरीय खेलकुद तथा साँस्कृतिक मेला–२०८१ अन्तर्गत घोराहीमा क्यारमबोर्ड प्रतियोगिता हुन थालेको हो ।
‘खेलकुद र संस्कृति दाङको पहिचान, स्वरोजगारको आधार’ भन्ने नाराका साथ दाङ सोसाइटी क्लबको १६ औं वार्षिकोत्सवको अवसरमा चैत २८ गतेदेखि १० गतेसम्म घोराही उपमहानगरपालिका–१४ झिगौंरामा मेला आयोजना हुँदैछ। प्रतियोगितअन्तर्गत खुल्ला एकल र जोडी क्यारमबोर्ड प्रतियोगिता हुने भएको छ।
क्यारमबोर्ड प्रतियोगितामा जोडीतर्फ प्रथम हुने टिमले नगद ३० हजार रुपैयाँ र द्वितीय हुने टिमले नगद १५ हजार रुपैयाँसहित मेडल र प्रमाणपत्र प्रदान गर्नेछ । त्यसैगरी, एकल क्यारमबोर्ड प्रतियोगितामा प्रथम हुने व्यक्तिले नगद २० हजार रुपैयाँ र द्वितीय हुने व्यक्तिले नगद १० हजार रुपैयाँसहित मेडल र प्रमाणपत्र प्राप्त गर्ने आयोजक दाङ सोसाइटी क्लबका अध्यक्ष लेखनाथ बुढाथोकीले जानकारी दिएका छन् ।
प्रतियोगितामा सहभागी हुनका लागि दर्ता शुल्क ५ सय रुपैयाँ तोकिएको खेलकुद संयोजक सुरेश पोख्रेलले बताएका छन् । उनका अनुसार, टिम दर्ता चैत २५ गतेसम्म गरिसक्नु पर्नेछ। मेलाले स्थानीय खेलकुदको प्रोत्साहन मात्र नगरी, सांस्कृतिक गतिविधिहरूको पनि सम्मान र विकास गर्ने उद्देश्य क्लबले राखेको छ।