बर्दियालाई हराउँदै दाङ क्वाटरफाइनलमा
घाेराही, २२ चैत । दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगिताकाे क्वाटरफाइनलमा दाङ प्रवेश गरेको छ ।
प्रदेश खेलकुद परिषद, लुम्बिनीको आयोजनामा बुधबारदेखि शुरु भएको प्रदेश स्तरीय प्रतियोगिता अन्तरगत लिग चरणकाे अन्तिम खेलमा दाङले बर्दियालाई ३-१ काे सेटमा हराउँदै क्वाटरफाइनल पुगेकाे हाे ।
३-१ काे जीत निकाल्न दाङले २५-१०, २०-२५, २५-२३, २५-२३ काे सेट खेल्याे ।
प्रतिष्पर्धात्मक खेलमा दाङ विजयी भएसँगै क्वाटरफाइनल समीकरण पूरा भएको छ । यसअघि, बिहीबार दुई टीम बीचकाे खेल कमजोर भिजिबिलिटीका कारण १-१ काे अवस्थामा राेकिएकाे थियाे ।
घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा जारी प्रतियोगितामा यसअघि क्वाटरफाईनलमा रोल्पा, रुकुमपूर्व, पाल्पा, अर्घाखाँची, बाँके, कपिलबस्तु र रुपन्देही प्रवेश गरेका छन् ।
समुह ‘ए’ बाट रोल्पा विजेता र रुकुमपूर्व उपविजेता हुँदै क्वाटरफाईनल प्रवेश गरेका छन् । समुह ‘बी’ बाट पाल्पा बुधबार नै क्वाटरफाईनल प्रवेश गर्दा अर्घाखाँची उपविजेता हुँदै अन्तिम आठमा पुगेको छ । समुह ‘सी’ बाट बाँके विजेता र कपिलबस्तु उपविजेता हुँदै अन्तिम आठमा पुगेका छन् । समुह ‘डी’ बाट रुपन्देही विजेता र दाङ उपविजेता हुँदै क्वाटरफाइनल पुगेको आयोजनकले जनाएको छ ।
याेसँगै अब क्वाटरफाइनल खेल पनि शुरु भएको छ । पहिलाे क्वाटरफाइनलमा राेल्पा र कपिलवस्तु बिच खेल हुँदा दाेस्राे क्वाटरफाइनलमा पाल्पा र दाङ बिच खेल हुने छ । यसैगरी, तेस्राे क्वाटरफाइनलमा बाँके र।रुकुम पूर्व बीच खेल हुँदा चाैथाे क्वाटरफाइनलमा रुपन्देही र अर्घाखाँची बीच खेल हुने आयाेजकले जनाएको छ।
लिगकम नकआउटको आधारमा खेलाइएको मुख्यमन्त्री कप प्रदेशस्तरीय महिला भलिबल प्रतियोगितामा प्रदेशका १२ वटै जिल्लाबाट महिला भलिबल खेलाडी दाङमा आएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ ।
फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।